王浩信邪氣逼人患抑鬱

王浩信不時演有錢仔角色，不過於劇集《法外風雲》中，罕有地演大反派二世祖。除感情上一塌糊塗外，更強姦又吸毒，浩信坦言很喜歡角色，亦因太投入，現時的他給人邪氣感覺，但他笑言並不介意，不過，浩信於拍攝期間曾患輕微抑鬱症，要太太陳自瑤多番勸喻下，才去看醫生。

為人父添壓力

提到劇中二世祖宋家耀一角，浩信指角色有不少起伏：「之前喺《名媛望族》衰得嚟好自閉，但今次衰得嚟有啲囂張，鍾意陳法拉之餘又會去玩馬賽，跟住又聽人唆擺吸毒，仲強姦馬賽，拍呢段劇時成日瞓唔到，個狀態諗好多唔好嘅嘢，跟住又飲酒，後來同老婆講自己好似有啲唔舒服，佢好擔心，勸我睇醫生，醫生指我有輕微抑鬱症。」除工作壓力外，浩信坦言已為人父後，壓力亦增加：「開始要諗錢、使費，甚至佢嘅學業，不過好多嘢由壓力變為動力，做咗人爸爸體會多咗，責任感亦大咗好多。」

年年都遭掌摑

繼《名媛望族》中被劉松仁掌摑13巴後，於《法外風雲》浩信再被謝雪心狠摑超過20巴，他笑言：「年年都畀人摑，觀眾對我拍呢啲戲都好期待，睇完佢哋都好深刻。」浩信多次獲提名「飛躍進步男藝員獎項」，對於今年獎項，他說：「有獎梗係想攞，不過有就當bonus，冇就再做好啲先。」浩信之前為拍台慶宣傳片練得八舊腹肌，拍攝期間更不慎引致手腕骨裂，不過他坦言已練上癮，會繼續操fit。

王浩信曾因太投入反派角色，患輕微抑鬱。	練得八舊腹肌的浩信，坦言已練上癮，會繼續操fit。	身為人父的浩信，自囡囡出世後，為人處事亦變得更穩重。

文：影視組

攝：沈健程