湯盈盈扯火狂轟滕麗名

無綫藝員滕麗名、湯盈盈及敖嘉年日前為賀歲劇《新抱喜相逢》開工，劇中阿滕及盈盈是歡喜冤家，當日拍攝盈盈與嘉年玩war game，以阿滕的紙板人頭做靶。另一場戲則拍攝飾演影后的阿滕與一班臨記開會，打算炮製一套電影欺騙嘉年的兄長麥包。

產後首復出

盈盈產後首度復工拍劇，她直言沒有要求早收工返家湊女，會盡力配合劇組：「復出得就要專業！不過好掛住個女，要成日睇住相同Video！」她透露家中安裝閉路電視，可隨時直擊女兒的情況，但搞笑地偷拍到嘉樂「偷食」：「見到佢半夜喺度食勁大塊牛肉乾，鬧咗佢一餐！做咗媽咪要注重健康，盡量夜晚八點後唔食嘢。」提到與阿滕飾演冤家，盈盈笑言「想鬧佢好耐」，可藉機發洩情緒：「本來我唔識射槍，但用咗阿滕嘅紙板人頭做靶後，眼界都準晒！」

婚期要讓位

阿滕表示與盈盈是同屆訓練班出身，特別有火花，問到會否怕傳不和？她笑說：「佢都生咗女，唔追求呢啲嘢，反而我先係搏殺期。」她透露賀歲劇既搞笑又溫馨，劇中她有不少戲中戲，造型超多：「一日換幾個Look，化妝阿姐都亂晒，喺度問2013年嘅妝係點，咪即係依家囉！另外監製話我要食田雞刺身，諗起都驚！」問到婚禮籌備情況，阿滕表示最近劇接劇，婚期可能延遲，至於確實日子？她賣關子說：「結咗你咪知囉！」

湯盈盈笑言無意中偷拍到老公錢嘉樂偷食。	其中一場打war game戲份，盈盈和嘉年更以阿滕紙板人頭做靶，相當搞笑。	阿滕透露劇中她有不少戲中戲，既搞笑又溫馨。

文：影視組

攝：唐豁莊