如城別戀

如：黃翠如　

城：洪永城

洪永城在有線時已與黃翠如合作拍旅遊節目。

沒太多演戲經驗的洪永城和黃翠如在《愛我請留言》中向黃浩然偷師。

首碰頭似見仙女

如：你記唔記得我哋第一次見面係幾時？

在《走過浮華大地》中，兩人有搞鬼演出。	黃翠如認為自己與洪永城的友誼不應與金錢掛鈎。	放大圖片

城：當然記得，喺電視大樓大堂，你啱啱由電梯行落嚟，我當時已經一早聽過你有「翻版林青霞」嘅大名，嗰刻我都覺得你好似女神，好脫俗，成個仙女咁飄落人間。你仲對我笑o架，不過之後拍完旅遊節目，我就發現係另一回事，原來有啲嘢真係只能遠觀！咁你又幾時見我？

如：我都聽過你嘅大名，好多同你合作過嘅女仔同我講，你好麻煩、好貪玩又少爺仔脾氣。結果第一次見你咪同你去澳洲囉，不過我對你嘅感覺同傳聞相反，我覺得你好好，尤其係你坐喺草地除埋鞋，嗰時覺得你同地球好接近，加上之後我仲發燒七、八日，你有好好照顧我，所以我返到嚟都幫你澄清番，話你好好！

感覺似老夫老妻

城：多謝你，其實謠言點講都好，最重要係有人賞識你，加上做旅遊節目就係要以赤裸一面見人，咁先係真性情，但亦容易令人誤會！

如：所以我好支持你o架！不過最近開始，我哋突然成為螢幕情侶，每一日都有人問我，就連街坊都問，明明我哋係好似屋企人咁，點解會咁？我真係理解唔到，聽講你有朋友仲話覺得我哋好似老夫老妻！

城：係，佢話我哋有啲動作，真係結婚好多年嘅人先會做，同埋種溝通模式，真係旁觀者先會發現，當然無可否認，我同你默契係好好。

一凹一凸有默契

如：咁到底我哋係幾時開始嘅呢？不過我開心o架，事關根本上唔係，但大家又當我哋係情侶，仲要咁接受，至少唔使搞到咁避忌，又清楚知道雙方優點缺點，最重要係冇愛情幻想，唔怕誤會。

城：我都認同，如果換成我同另一個傳緋聞，真係怕私下人哋唔知點諗，又怕會影響大家幸福。不過我對你冇愛情幻想，可能因為你當我係細佬，而且我要嘅女友元素你都冇，我傾向外向啲，但有你呢個知己陪我去旅行都好。

如：其實係識你咁耐，你都幾影響到我諗法…

純友誼唔使講錢

城：你就影響到我收入囉！

如：你又嚟，每次我講啲好感性嘅睇法，你就會同我講商業元素，仲試過因為咁嗌交，真係覺得同你嘅友誼唔需要講錢囉，嗰次我好嬲o架！

城：我知，你仲鬧我可唔可以唔好成日講錢，不過我只係想你諗到全面啲、宏遠啲，大家互補凹凸唔好咩？

如：好，確實你好識諗將來，我就比較注意當下、零計劃，所以因為你，我有諗多咗。其實我仲好依賴你，好似每次出trip我雖然唔使你照顧我，不過我就係想你陪住喺我身邊。

承諾改變多關心

城：但我喺你心目中只係細佬角色，又唔識照顧人，尤其係唔照顧你，其他女仔都好啲，可能我一直都覺得你好獨立，經歷過咁多自然搞得掂，我就可以輕輕鬆鬆啦！

如：你對我真係最冇風度，不過坦白講我又接受，好似就連夾餸、拎嘢，你都唔會幫我。

城：都係喎，好啦，呢方面我會檢討，再對你關心多啲。其實連黃浩然（與洪永城及黃翠如一起拍劇）都係咁話我，成日唔照顧你。

如：我都想叫你跟佢學吓，以男演員嚟講，浩然會令身邊每個人好舒服。

夠嗲啱晒做姊妹

城：我演戲都未去到佢個程度，仲要去照顧人？畀我一步一步嚟啦。

如：講起做戲，依家我哋連情侶都扮埋，你仲有冇乜角色想同我合作？我好想同你做姊妹！我覺得你有做同性戀者嘅潛質，因為同你拍劇時，你有嗲聲嗲氣，好有騷味。

城：雖然我覺得有挑戰，但都係留番畀「蘇基」（古明華）。我反而想你做我妹妹，畀我試吓照顧人。

如：我都想畀你照顧。

城：我諗當中會有幾多烏龍嘢，希望真係有呢個機會畀我去試吓照顧你。

如：係，期待！

後記：缺情侶化學作用

有研究指男與女能夠成為單純的好朋友，機會率極微，記者看着黃翠如和洪永城一唱一和，也一度懷疑他們，但見翠如對洪永城的態度，兩人確實少了一種情侶間的化學作用，或者兩人正是「罕有」一族，可尋覓到心靈上的知己，希望他們會一直「恩愛」下去，在吵鬧之中帶給大家更多歡笑聲！

文：藍嵐

攝：沈健程