偉仔學友力撐 阮兆祥挑戰舞台王者
藝人阮兆祥下月十四及十五日舉行「阮兆祥2013 一祥朋友演唱會」，前晚他在記者會上宣布加開十五日晚場，合共三場。無綫高層樂易玲撐場，大會播出不少名人紅星的打氣短片，包括「影帝」梁朝偉、「影后」劉嘉玲、「歌神」張學友等等，早前同祥仔傳不和的李思捷又在片中抵死話：「I Hate You！」，曲線支持。
司儀黎芷珊在台上同祥仔合唱《從不喜歡孤單一個》，又向祥仔送上「最Like演唱會獎」，提到星級打氣片，祥仔就話好感動，最意外連學友、偉仔等都拍片支持，祥仔又話有意邀請他們做座上客，至於會否再度加場？祥仔透露如果反應熱烈，可能加開十四日的日場，又笑言自己後生，應「頂得順」。
唔會當眾求婚
問祥仔屆時可會騷身材？他直言未必會，不過就下戰書「挑機」：「我上月尾開始練舞，想挑戰舞台王者！」又問祥仔會否在演唱會上向女朋友求婚？祥仔就笑言此舉十分「戇居」，又話：「唔會喺眾人面前求嘅，留番喺私人時間實行，不過唔會畀自己特別限期。」
另外，提到有傳「視帝」陳豪同「視后」楊怡有意離巢外闖，樂小姐就坦言：「佢哋仲認真考慮緊（有傳TVB禁止藝人北上拍劇？）由頭到尾都冇。」樂小姐又大爆公司有新Plan，會早一年Mark實藝員的檔期，她又直言：「啲藝員可以以公司行先，同時Mark實咗個期，都方便藝員出外接job。」
文：音樂組