陳展鵬求婚不遂 硬抱鍾嘉欣
蕭正楠與緋聞女友何傲芝昨晚同場，前者被追問戀情時尷尬滴汗。而陳展鵬不避嫌於台上翹實鍾嘉欣及貝安琪，之後他又與嘉欣密密斟，於拉票環節時更下跪向女方求婚，但嘉欣say no，展鵬即抱起她，非常搞笑。
鍾嘉欣、陳展鵬、蕭正楠等昨晚出席無綫電視劇《巨輪》一連兩集大結局的飯局，由於蕭正楠緋聞女友何傲芝擔任司儀，二人即成為焦點。而「三角關係」的陳展鵬、鍾嘉欣及貝安琪不避嫌於台上翹手，之後三人並排而坐，展鵬更與嘉欣雞啄唔斷。
坐月送薑餅
蕭正楠笑言多謝公司安排，更大讚何傲芝又靚又出色。問感情是否已昇華？他尷尬滴汗謂：「係好friend。（好似親人咁？）哈哈哈！」對於展鵬之前甚多新聞，更被指斷背，蕭正楠慶幸自己沒緋聞，並強調事業心重。在旁的何傲芝即稱事業心重是好事，明撐男友，二人不停互笠高帽。蕭正楠人憑劇貴擔任餅店代言人，冇份拍《巨》劇的何傲芝似想向「男友」撒嬌，竟講錯自己有份拍，她謂：「我哋拍咗呢個劇好多餅食，惟獨未試過薑餅，都唔知係咪收埋晒。」記者問蕭正楠是否訂過大禮餅？他笑言：「冇人攞薑餅過大禮，坐月就諗過送薑餅，你生嗰陣送畀你啦！」
坐監袋電話
拉票環節時，展鵬跪低問嘉欣會否嫁給他，女方稱不肯，展鵬即時抱起她，場面搞笑。展鵬被問劇中播至他坐監時，衫袋裏竟袋有iPhone，他指太久已不記得，但自爆拍劇時忘記拉褲鏈。對於斷背傳聞，他強調喜歡女仔。嘉欣透露近排經常被狗仔隊追訪，幸而有街坊提水。問是否男友伍允龍投訴？她扯開話題說：「都幾好呀！依家多咗時間喺屋企睇劇本，旅行都冇去。」
另外，貝安琪昨日出席另一活動，她坦言若男友茹素會加分。提到展鵬被傳是同性戀者，若果是真，是否不能接受做男友？她謂：「做朋友咪得囉！佢鍾意男仔我可以點？（有信心拗直佢？）佢食齋先啦。」
文：影視組