Kelly憶述小產哭成淚人
陳慧琳（Kelly）接受黎芷珊訪問時，勇敢道出當年人工受孕下懷有孖胎，但最終不幸流產的傷痛經歷，Kelly透露懷孕二十多周時穿了胎水，當時躺在醫院病床，一瞓就痛醒，且發現流血，如果勉強留住一對BB亦不會健康，Kelly說到觸痛處，不禁哭成淚人。
陳慧琳接受節目《最佳女主角》主持人黎芷珊訪問，談到與初戀情人兼現任丈夫劉建浩的關係維持多年仍然恩愛，Kelly表示最重要是大家都專一。黎芷珊問到Kelly一生中遇到最大的挫折和痛苦的一件事時，Kelly勇敢道出當年透過人工受孕下成功懷有女孖胎，但最終懷孕五個月後不幸小產。
沖涼突流好多水
Kelly傷心地說：「記得當時沖緊涼突然好多水流出，我都唔知乜事就打畀醫生，佢叫我第二日入院檢查。翌日醫生話我係胎水穿咗，要入院上床瞓，唔畀佢（BB）出嚟，當時先得廿幾周，但要等到三十周期。」
談到此處Kelly已按捺不住，淚如泉湧續說：「捱吓一日又一日，有姑娘同我講有機會（生）嘅，同房有病人都得，但我感覺到好痛，幾晚都瞓唔到，一瞓就痛醒，原來下面開緊。痛咗幾日醫生再檢查發現已經流血，原來下面開晒，其實……係咁囉。」
面對人生的重大打擊，未有將堅強的Kelly打倒，她還與丈夫有另一個想法，她說：「我哋有諗過如果夾硬留住佢，出世要住氧氣箱，小朋友不健康亦不是好事。」問到Kelly花了多久才能走出陰霾，Kelly說：「好在生過一次『蝦蛟仔』，有信心再來一次。若第一次就流產，相信我唔敢再生，會好辛苦。」
想四十歲前搞晒
Kelly回想流產的慘痛經歷，表示可能是孖胎太重的關係，導致這次意外發生。至於為何選擇人工受孕？她直言是心急：「冇咁辛苦，搞咁耐都冇消息，想四十歲前搞晒。年紀大……頻密啲先有一個，不如搵醫生保證係隻靚蛋。」
文：影視組