陳智燊進駐台慶劇接棒上位
陳智燊（Jason）深受無綫力捧，連近日熱播的台慶劇，Jason亦有份佔一席位。外表官仔骨骨的Jason，坦言今次會同王浩信有激烈的打架戲份，衝破自己的乖仔形象。而忙於拍劇的Jason，更表示初入行時，因連的士錢都無，所以要在藝員休息室過夜，自得其樂的他卻大叫舒服！
無綫小生陳智燊（Jason）深得公司力捧，密密劇接劇無停手。早前有幸成為男主角的Jason，近日更有份參與台慶劇《法外風雲》演出，他直言心情興奮：「其實之前都已經興奮完，因為拍嗰陣就知係台慶劇，所以都好開心。」在劇內飾演律師的Jason，外表官仔骨骨，不過原來是個「衝動派」，他說：「劇入面我係保護家人嘅角色，不過後尾就好衝動，最後仲會同王浩信有打架戲份，都幾激o架！」拍過無數劇集的Jason，坦言今次角色最似自己：「大家都係重情義同孝順，可能角色上有啲位會放大咗，但我覺得係最似。」
為慳錢瞓休息室
大學畢業的Jason坦言在現實生活中，從未打算過做律師，皆因自己讀經濟出身：「我嗰陣都係諗自己做會計師同銀行家。」面對樓市高企，問Jason有否盤算何時成為業主，他笑言：「計唔到呀。（心目中理想居所？）又冇特定呀，不過最少都要800呎啦，同埋我都想同屋企人住。」不過，拍劇連休息時間都冇的Jason，坦言有試過為慳錢而瞓藝員休息室：「嗰陣啱啱入行住上環，凌晨4點收工，第2日要開朝早7點，連的士錢都冇，所以去休息室瞓覺，但其實真係幾舒服o架。」
文：專案組
攝：劉智源