蔡加讚送戒指巴結姊妹團
「玩具大王」蔡志明兒子蔡加讚前晚單拖出席手錶展覽，他表示婚禮事宜搞得七七八八，問到爹哋是否送樓作結婚禮物？他表示不知道，但未決定婚後是否與父母同住，因想過二人世界。他稱兄弟團都是二十年從小就認識的好朋友與同學，圓圓的姊妹團都是親戚與圈外朋友。問到傳苟芸慧因負面新聞而被踢出姊妹團？他說：「唔清楚！（有無請佢飲？）唔知，你哋問圓圓！」
對於會否擔心被玩？加讚說：「班姊妹太有計劃，超級擔心被玩。（圓圓表妹湛琪清笑話如果你送佢寶石戒指就手下留情喎？）都要巴結吓班姊妹，諗諗吓都要送吓戒指。（靠班兄弟？）我同佢哋講若然嗰日被玩唔知食乜可能肚屙，結唔到婚就關佢哋事！」