徐濠縈爆Eason少湊女 揼錢補鑊
【馮雪怡上海直擊】潮人徐濠縈投訴老公陳奕迅（Eason）從前是工作狂，更因而忽略家庭。當年她誕下女兒包包數天後，Eason已要到內地工作，阿徐直呼湊女辛苦，但好在阿徐指Eason一向任她使錢，算是對她的補償。
潮人徐濠縈、「林峯女友」吳千語、內地影星孫儷、名模Amanda S.、黃偉文、林德信等前晚出席時裝品牌Carven於上海舉行的首場中國時裝騷。
阿徐表示第三次見藝術總監Guillaume Henry，第一次在香港，之後巴黎，今次上海。而問到她的老公陳奕迅指當年在她懷孕時虧欠她，問她有否為Eason當年不陪她而不開心？她說：「好彩佢陪我入產房，我了解佢性格，知佢大細路，冇expect佢做普通爹哋責任。」她投訴Eason於她產後數天便去了內地拍劇，很少幫忙湊女，囡囡包包由她一手湊大，坦言覺得辛苦。但她亦不忘補飛讚Eason：「佢一向任我買嘢，成日氹我。不過最重要搵時間同囡囡去旅行，有時佢會陪幾日，之後又返去頒獎禮。佢以前係工作狂，係疏忽少少。」
千語閩南話打招呼
而於剛過去的27日生日的吳千語，被問到正日是否與林峯二人世界？她說：「唔係，嗰日喺東莞做嘢，有同一班工作人員食飯，佢（林峯）都喺度。（有冇同你補祝？）食飯一定會，（送咩？）唔講。」而問到她日前於林峯家鄉廈門宣傳電影時，被指當女主人般禮待，她說：「平時宣傳一樣，可能我講左幾句閩南話打招呼。（見佢爸媽？）冇，工作full晒。」
至於Amanda S.與老公Christian一起出席，現場見她老公紮住右腳，她透露對方早前踢足球後脫鞋周圍跑，結果弄傷腳趾尾，令她啼笑皆非。問到是否全天候服侍老公？她笑言：「係，依家佢返到屋企扮ＢＢ，咩都叫我做。」