梁慧恩推平民貓山王

以工作狂人來形容梁慧恩（Viann），絕不為過，近年要兼顧碩士研究生學業又身任能源公司顧問、電台主持、幫屋企打理大型家族生意，工作多得有點透不過氣的感覺，但Viann仍嫌自己不夠忙，最近還搞起榴槤甜品生意。因工作繁多，時間對Viann來說相當寶貴，既然選擇付出時間搞生意，當然要做到最好，所以她花了半年時間籌備。

頂級榴槤

Viann表示：「今次我同朋友集資近八位數字，當然唔係搞一間舖頭要用咁多錢，而係我哋特登去馬來西亞、新加坡傾咗個頂級貓山王榴槤甜品特許經營權，呢個特許經營權仲會去到廣東省同澳門，貓山王係頂級榴槤，味道甘香好多人鍾意食，但由於產量唔多又難於保存，所以好矜貴，大型超市買一個要七百至一千蚊，我哋想將呢種美食，做到平民化嘅價錢，所以都傾咗好一段時間！（老公林忠澤有無經濟上支持你？）佢精神上支持我，佢有佢嘅生意，所以呢間甜品店我會同朋友一齊搞。」

Viann笑言連不吃榴槤嘅朋友都把鎮店三寶吃清光，畀她不少信心。

Viann的拍檔大廚Victor（右）經驗豐富，由他主理的甜品，單看賣相已令人食指大動。

堅持「唔溝」

有頂級榴槤當然要有大廚主理，Viann首間駐足元朗的甜品店，便由擁有三十年製作貓山王甜品經驗的新加坡師傅兼Viann生意拍檔Victor主理，他對榴槤甜品的堅持是「唔溝」，用純貓山王榴槤作甜品餡料，配以新穎做法創出特色美食，Viann：「我哋有七、八款甜品，最緊要質量好，其中鎮店甜品貓山王雪糕、貓山王班戥夾餅，連一向唔食榴槤嘅朋友嚟舖頭試食，都食唔停口，所以我好有信心！」

文：影視組