吳雨霏放低失「樂」寄情創作
吳雨霏（Kary）為本月推出籌備近一年的新專輯不惜一腳踢，榮升監製的她坦言壓力很大，曾一度懷疑自己能力，雖然中途與前男友余文樂分手，但無阻其創作靈感，弱質纖纖的Kary坦言是個拎得起放得低的人，認真瀟灑！
Kary年頭開始為新專輯「動工」，與兩名音樂好友絞盡腦汁創作歌曲，首度做監製的她說：「所有歌自己寫同監製，真係一腳踢，多咗個角色畀自己壓力大好多。」她承認見到「BB」出世時充滿滿足感：「過程都驚，唔知大家鍾唔鍾意自己嘅作品？但一定係入行11年嚟最大滿足感嘅一張碟。」
現實寫照
問到歌曲內容是否過去一年的心情寫照？Kary大方說：「絕對係，大部分歌都係自己心境。」年中宣布與拍拖幾個月的余文樂分手，Kary不禁憶起點滴：「做碟心情都有高高低低，講真，一段感情完咗梗有唔開心時候，不過唔開心兩、三日，就要努力面對，可能我個人拎得起放得低、又男仔頭，好快就勇敢同積極去做應該要做嘅嘢！」
Kary又感激唱片公司體諒：「同阿樂分手嗰段時間，屋企人、同事、朋友都有安慰，不過唔會多問，好感激公司嘅支持、好明白我，從來冇催我隻碟快啲出。」對於年底各大頒獎禮，Kary直言最恨奪創作獎：「好想得到創作獎，會好開心同好大鼓勵。」
文：火品木
攝：吳文聰
化妝：Arris Law
髮型：Heibie Mok@Hair Culture
服裝：N/TICE@D-MOP
場地：Penthouse Funky Club