啟華撐TVB 劇集冇得輸
吳啟華回巢拍劇勁撐無綫，提到網民發起「熄電視」行動，他直言可以質疑政府為何不發牌，但事件與無綫無關，並說就算「香港電視」獲發牌，製作亦贏不了無綫。另有指楊怡追隨經理人劈炮一事，她稱合約明年一月才滿，還在斟洽中。
藝人吳啟華、楊怡、馬國明、羅仲謙等人昨日到醫院為台慶劇《On Call 36小時II》造勢。對於前晚有網民發起熄電視行動，無綫出身，曾效力亞視的啟華有另一番見解，力撐無綫不受「香港電視」影響：「做咩要咁做？（指熄電視）依家都有亞視存在，但大家始終都係睇無綫，過去亞視都有fight（博鬥）過，曾有套由前無綫監製鄧特希所拍嘅《法網群英》，質素算係唔錯，但當時點解大家都唔睇而睇番無綫呢？如果『港視』有牌，到時佢有劇出，而無綫又出套《On Call III》，咁命運咪又係同亞視一樣，根本無分別！今次事件，只可以話政府唔發牌，但唔關無綫事，唔可以怪佢，咁好唔公平！無綫咁多經典劇，海外咁多觀眾鍾意，『港視』出嚟一定好嘅咩？我唔覺得係喎！我唔信『港視』贏到無綫！」
合約斟洽中
另同場楊怡被問到是否隨經理人離開無綫？她表示與無綫仍有合約：「合約到明年，現正斟談條件，但會以無綫為首選，希望有更多時間陪媽媽，或有機會多拍電影、到內地發展見識。」楊怡強調不清楚經理人去向，望稍後再有機會合作。而馬國明對有傳陳豪離巢而獲力捧上位，他笑說：「乜唔係用獎嚟留佢咩？應該先留陳豪，過兩個月後再捧我！（爭視帝？）戰況激烈，我能躋身五強已可還神！」
此外就「熄電視」行動下，無綫黃金時段收視較去周同時段相比影響不算很大，其中《最佳女主角》收視不變，兩線劇《法外風雲》及《巨輪》只跌1及3點，而《東張西望》及《愛．回家》則跌了4點。
文：影視組