陳靜泰輕鬆 等復工
女星陳靜（DaDa）昨現身機場，心情已好轉的她去泰國休息，並揚言情緒病已減少藥量，但並非怕肥而減藥，因自己不介意肥胖亦笑言「無瘦過」。談到跟導演們的關係，DaDa會交由公司處理，她說：「我點都會道歉，因為自己當時處理得唔好！」
DaDa前日向經理人施念慈斟茶認錯並獲得原諒，本月亦告全面復出，昨日，DaDa與女友人現身機場，原來想趁復工前去泰國「鬆一鬆」。身穿tubedress、外套、戴黑超的DaDa，心情不俗，面露笑容，記者問她有關復出的問題，她笑言：「等公司安排，稍後有記招，好多嘢等記者會先講。（做番幕前？）之前唔做嘢好悶，當休息，亦係一次幾好嘅經歷，可以令我更加了解自己。」她承認去陽光海灘的泰國。
食一袋藥
之前備受情緒病困擾，現時DaDa覺情況OK：「藥都食少咗，食藥會令人好易腫，因為要工作唔能夠太腫，反而心理控制緊要啲。（要食幾種藥？）要食一袋藥啦！有啲藥係因為瞓唔到先食嘅。」記者再問她減藥是否怕肥？DaDa說：「我唔介意肥，自己對於肥呢樣嘢，心態都OK，我一向都唔係瘦啦。」
處理得差
DaDa早前失蹤致令錢國偉的《喜愛夜蒲3》陣腳大亂，DaDa沒有特別跟導演聯絡，她說：「同彭浩翔曾經食過飯，當日都有送上祝福。（同導演的關係如何？）交畀公司安排，唔方便講，慢慢再傾，點都要道歉！（好愧疚？）都係自己處理得差。（驚唔驚導演唔再用你？）都有可能，我都唔能夠要求人哋點諗，順其自然，會把握機會再努力。」
而李連杰、狄波拉夫婦之後相繼現身機場，李連杰去杭州出席品牌活動，拉姑去泰國拜神，問她最近有沒有見過兩個孫？她未有回應。
文：影視組