張智霖揮低陳豪 攞硬台慶視帝

今屆無綫台慶頒獎禮定於12月16日舉行，賽果向來唇齒相依的馬來西亞「Astro我的最愛頒獎典禮」則於12月1日揭開序幕，有指無綫「非親生仔」ChiLam竟特意請假出席此「熱身賽」，難怪盛傳ChiLam對Astro視帝寶座已十拿九穩！至於ChiLam於無綫視帝獎項同樣呼聲甚高，分分鐘揮低大熱黎耀祥及陳豪。

與無綫合作多多

ChiLam憑《衝上雲霄II》人氣再度攀升，早前他簽約新經理人公司前，有指無綫曾出「重酬」望將ChiLam收歸旗下，雖然最終告吹，但ChiLam與無綫關係日趨緊密，除已落實明年合作開拍《衝》劇電影版外，有指無綫亦急急部署，望ChiLam明年答允再拍劇。最近無綫分別於收費電視推出《我們的張智霖》系列，以及稍後於免費台安排重播其主演舊作《西關大少》，落力將ChiLam人氣再推至沸點！

獲無綫如此「厚愛」，ChiLam昨日接受電話訪問時坦承：「我係會出席Astro喎，因為11月30日我會喺馬來西亞舉行演唱會，都係留多一日啫。（TVB搵你再拍劇？）係有咁嘅打算，都傾過吓，如無意外會係出年下半年嘅時裝劇。（聽講你今年攞硬視帝？）獎項嘅嘢我多多都歡迎，但平常心啦。（你唔係親生仔都對你咁好？）如果成真，咁咪證明佢哋公平囉。（唔驚畀人話拍劇換獎？）乜有得換咩？我以前年年都拍一套，又唔見頒個獎畀我？哈哈﹗」

ChiLam亦承認為無綫拍劇能達致「雙贏」：「成件事冇負面嘢，咁點解唔做呢？依家只係檔期問題，因為出年我會比較多搞作，想帶啲驚喜畀大家。」問他新劇拍檔和角色等，ChiLam稱「言之尚早」：「遲啲先決定，總之我尊重製作人同團隊，自己唔會有咩特別意見。」

鎮宇祝旗開得勝

同是《衝II》男主角的吳鎮宇，目前正身在內地拍戲，他透露Astro方面未有邀請自己，故屆時不會亮相：「祝ChiLam旗開得勝啦，其實唔係咁多頒獎禮邀請我出席，即係證明我還需努力囉。（無綫視帝有冇信心？）我覺得自己機會不大，但無論如何，TVB係我『母校』，我出年都會返去拍劇。」

文：影視組