汪圓圓單身幼稚鬼
萬聖節就到，不少藝人都喜歡開Party慶祝一番，對於模特兒汪圓圓來說，今年特別具有意義，原因這是她婚前最後一個單身萬聖節，笑言與準夫婿玩具大王愛子蔡加讚同樣是玩得之人，兩人都想趁單身，笑言還有條件玩幼稚，玩嚇人。
《莎莎婦女銀袋日揭幕》
模特兒汪圓圓
「我會開個主題Party，我喺外國長大，好鍾意萬聖節，覺得嗰日會有好多糖食，今年係我同加讚結婚前嘅萬聖節，我哋都好幼稚，好鍾意扮嘢，或者佢扮Batman，我扮Catwomen。」
《GODIVA活動》
熊黛林長髮女鬼
「我把頭髮咁長，可以化身成長髮女鬼，唔係恐怖嚇人妝，我要做靚女鬼，半夜三更出去嚇朋友！」
吳千語派對玩波
「今年我會開一個Party，個場地要有好多氫氣球、好多南瓜，自己都會扮鬼扮馬，但清一色女仔朋友玩。」
《香檳晚宴》
何倍倩嚇鬼老公
「我最想嚇我老公，我會半夜三更趁佢瞓着出嚟嚇佢；我試過屋企放咗個人形公仔喺書房，老公夜麻麻入書房嚇到大叫！」
《I.T x Galeries Lafayette開幕》
周麗淇唔好嚇我!
「我好驚鬼，唔會炮製派對，唔明啲人點解要慶祝，我試過玩鬼屋，好驚！我會等萬聖節自己過去，我咩都唔知，呼籲大家唔好嚇我，會嚇死我！」
《飛利浦活動》
Mandy Lieu自製鬼屋
「我鍾意玩鬼屋，所以我會想將自己間屋布置到勁有Halloween氣氛，打造成『Mandy鬼屋』，邀請朋友嚟玩，我亦會親自扮鬼，嚇餐飽！」
《香檳派對》
許亦妮一齊嚇人
「我希望同埋一大班朋友一齊去嚇人，其實我自己好驚畀人嚇，我覺得突如其來嘅驚嚇係最驚！」