余安安Janice Man母女情深

余安安：余 Janice Man：JM

余：當時你喺電影《大追捕》入面演我個女，我要求導演安排開鏡前同你食餐飯，見吓你，培養吓感情先，等我鍾意你、錫你，先建立一份母女情我覺得會好啲。第一次見你，你畀我感覺係好sweet，講嘢夠爽直，呢種就好似我，估唔到相處落嚟我哋又幾投緣喎，真係緣分嚟。

JM：未真正見面前，你知唔知有個叫Janice Man嘅女仔？

余：我知，當時你喺我字典入面係個model囉，所以當知道你要去演呢個角色係會擔心，我都有同導演講呢個角色唔易做，都擔心你能唔能夠駕馭得到。最後電影出嚟效果好好，你係放咗唔少心機，呢樣我好欣賞，令我好surprise。

JM：都要多謝導演諗到我同你演母女，令我哋認識，但我估佢諗唔到套戲拍完之後，我哋真係建立咗份友情。其實我個人幾被動，如果約你幾次你都唔應約，我就唔敢再約你。

Janice Man	Janice Man、余安安	母女情由戲內延續到戲外，極為難得！

余：咁我哋都好啱Key，大家都為食，所以我哋約出嚟多數都係食嘢傾偈，反而冇乜約去shopping扮靚。

JM：約唔到出嚟，我哋都會傾電話講吓心事。

傷心落淚

余：你有一次仲講到喊添！

JM：有咩……？

余：係遇到一啲工作嘅問題，唔關感情事，你感情handle得好好，唔使我為你擔心。你個樣可以畀人覺得唔係醒目女，但其實你有主見，做呢行要知自己想要乜，目標清晰最緊要。

余安安	余安安、JM因合作拍戲結緣。	余安安與Janice Man 感情要好。

JM：我唔係個個都講到心事，都要睇吓係咪我傾訴對象，呢個一定係我好信任嘅人，喺呢行入面你係其中一個。而我最佩服你同兩個女嘅關係好親密，friend到好似朋友，雖然我同媽咪都好friend，但可以friend到一齊蒲就好犀利！

余：阿女啲朋友好鍾意我，仲問我點解呢兩年唔見我出嚟玩，我答佢：「I am tired。」我依家係enjoy另一種生活，同家人、朋友食飯傾吓偈。而由細到大同兩個女溝通方法，似媽媽又似朋友，我可以同佢哋分享經歷，而唔係用說教方法，呢種方式相處最舒服。

JM：我哋成日都話一齊去旅行，但一直都未成事！

余：時間係好難就，我之前約你去日本睇櫻花，你又唔得，遲啲我又去美國嘞。

JM：如果有機會去遊學進修演技都好。

余：有啱嘅課程我都想去，但要有個長假，三個月學唔到乜嘢，嘥氣……，唔好話我認叻，我都可以教番佢轉頭，所以要至少係一年嘅課程，學啲深層次嘅演技先有用。我會鼓勵你去到某個階段再去增值自己演技。

JM：坦白講我現時未有一個安全感，令自己敢去做呢件事。

余：依家你正係搏殺期，又點可以擺低晒啲嘢就走去遊學？有心去學永遠都唔會遲，到適當時候我哋一於約埋去返學啦。

JM：好呀，到時有你呢個阿媽照顧一定好開心。

親手頒獎

余：乜係咁o架?!但反而我最想嘅，係喺金像獎頒獎禮舞台上，可以親手頒個獎畀你喎。

JM：Oh my God……如果有呢一日出現，仲有呢種緣分由你頒獎畀我，真係會好感動，但我知係好長遠嘅事。

余：要有目標，係推動力，畀心機，我等你o架！

JM：希望嚟緊我哋有機會再一齊拍戲啦，但今次唔做你個女，要做你個妹。我都覺得做演員要接觸多啲新事物，唔可以局限一個框框入面，只識得演一種戲路，成功演員可塑性高最重要，要演活一個角色，係需要細心揣摩好多嘢，唔同做model只需要着靚套衫就可以。

余：睇你講得頭頭是道，有自己見解，唔係一個花瓶嚟，抵我欣賞你咁錫你嘅。

後記：戲假情真

訪問前一天，余安安已患上感冒，來到訪問現場更是鼻水不停流，但事前安安未有向JM透露半句自己身體不適，免得JM因為她而取消訪問，搞到爽約人前。安安十足現實生活中的母親角色，能夠幫到個女，就算自己幾辛苦都會頂硬上，她與JM這份「母女情」絕對是「戲假情真」的好例子。

文：高美美

攝影：劉智源

場地：都會海逸酒店

Janice Man服裝：Simon Rocha，Rag & Bone

化妝：Bronte Wong

髮型：Zap Tang@Xenter

余安安髮型：Terance@Hair Salon