杜德偉拖孕味Ice出巡

去年11月11日Alex與比他年輕廿四載，任職攝影師的女友Ice Lee拉埋天窗，雖然Alex年過半百，外家對他卻有不少寄望，於婚禮上送出「金豬頸鏈」，擺明想兩人盡快開枝散葉，兩口子結婚一周年未到，繼續浸淫在新婚喜悅中，經常結伴周圍飛，愛的足迹遍布不少地方。

老婆脹爆

大前日下午5時許，Alex與老婆齊齊架上黑超出現中環，兩人於餐廳內恩愛地邊食邊傾，其間Alex飲完自己杯飲品，老婆體貼地將自己那杯遞上，Alex冧爆地一啖飲晒，兩人醫肚後拖到實步出，只見杜德偉man到爆地一手拖老婆，一手推住行李。

現場所見向來圓潤的Ice，比起之前更見脹爆，身形明顯肥了一個碼，一身鬆身衫亦難掩肚凸凸，加上腳踏平底鞋，孕味十足，兩人十指緊扣地慢步向機鐵站方向走去。

結婚半年的Ice，當時身形較瘦。（資料圖片）	杜德偉與Ice撐枱腳開餐，疑似有喜的Ice胃口甚佳。	身形脹卜卜的Ice疑似有咗，驚現巨躉。

食多咗嘢

記者致電Alex，問及太太是否有喜，他聞言哈哈大笑，並說：「未有嘅，嗰日太太陪我去機場，佢承認呢排開心咗，食嘢食多咗，減緊嘞，遲啲會苗條番啦！我哋唔心急嘅，好開心依家嘅二人世界，如果有BB會第一時間話畀大家知。」他表示自己正忙於在北京宣傳新唱片，稍後會去台灣為小型演唱會排練，而太太亦會為其演唱會擔任視覺監督，齊齊合作。

文、攝：追蹤組