張家輝冇膽入「金魚缸」
張家輝、古天樂及劉青雲三大猛男前晚出席新片首映，齊齊身穿禮服執到正，眾星大放笑彈，台上更爆出「泰國通」盧惠光曾帶三人到「金魚缸」，嚇得他們擰頭否認，家輝笑言：「想啫，但最終冇去。」
影帝劉青雲、張家輝、古天樂、盧惠光及盧海鵬前晚到九龍灣國際展貿中心出席「第十屆香港亞洲電影節」開幕禮，宣布由陳木勝執導的寰宇電影《掃毒》成為開幕電影，以及「羅馬電影節」閉幕電影。
梅麗史翠「輝」
台上眾人分享拍攝經歷，笑料甚多，青雲將獲獎無數的家輝比作奧斯卡影后梅麗史翠普：「好開心同梅麗史翠『輝』合作，佢拍一套就攞十幾個獎，仲有天下第一型男（古天樂）！」而古仔一度分心講錯戲名，自己也忍不住笑。
盧惠光表示電影在泰國拍外景，令他很有親切感，更笑言曾帶幾名男主角去參觀「金魚缸」，但事後古仔、青雲及家輝齊齊擰頭否認曾到「金魚缸」，青雲笑說：「呢啲嘢問家輝啦！」家輝即說：「冇，想啫！聽聞依家新興啲大廈好靚，估唔到係金魚缸，想見識吓啫。」問到會否攜眷出席羅馬電影節？家輝表示過往經常一家人出埠，今次難得一支公旅行，青雲則抵死地說：「冇諗過帶，但佢要跟住嚟。」
秋官腔唱爆咪
片中有大量動作場面，飛車、爆炸及跳樓戲「應有盡有」，青雲繼續笑指自己置身事外：「我就唔係好危險，有場戲家輝吊到好高，當時我哋抖緊，佢喺高處真係lonely（寂寞）喇！」
三子又透露重唱鄭少秋《陸小鳳》金曲《誓要入刀山》，並拍了個搞笑版MV，青雲說：「好正，家輝仲唱到有『秋官腔』，頂佢唔順！」家輝即搶咪示範，場面搞笑。
此外，對於免費電視發牌事件，古仔支持應多發牌：「其實多幾個台有咩所謂？大家有更多選擇。」青雲亦表示支持，但不會出席集會，並指這日他們穿黑色禮服已代表支持。
文：影視組