琦琦搶鞋 大條道履
明星、名人一向緊貼潮流，對時尚動向非常敏感，更會對某一類飾品情有獨鍾，一旦遇到心頭好，當然亦會「盲搶」一番。琦琦對鞋鍾情，但無奈是大腳板，所以見到啱size變得瘋狂，試過一口氣搶購三十幾對鞋；而冼色麗特別喜歡收集假眼睫毛，現已搜羅咗幾十盒。
Rosemary：「我會買好多蔬菜，因為我好鍾意食，每一日都會整蔬菜汁飲，保持健康。」
冼色麗：「我有收藏假眼睫毛癖好，但我唔用o架，之前有傳台灣有個品牌唔再出假眼睫毛，我即刻狂搶咗幾盒，依家屋企都有幾十盒。」
貝安琪：「沙士期間媽咪就搶口罩，我自己就好鍾意瑪麗蓮夢露，我會癲咗咁買佢嘅書同畫嘅collection。」
趙嘉懿：「我會搶童裝，我覺得好靚，自己又有個小朋友，想幫佢dress up唔同嘅look。」
熊黛林：「最多搶袋，我唔會跟人盲搶任何嘢，冇乜嘢係需要買好多，夠就ok，唔會貪心。」
任達華：「琦琦試過喺英國一買就買咗三十幾對鞋，全部都係我拎住返酒店。」
琦琦：「因為我對腳size比較大難買鞋，喺外國見到就會買多幾對。」
何傲兒：「我好鍾意一隻叫B女嘅公仔，仲會買衫、首飾畀佢換，仲試過自己車衫仔畀佢着添！」
陳柏宇：「我會買好多支支裝水。因為我平時一向唔飲煲嘅水，覺得有陣味。」