周柏豪怕反胃 唔追JM
文詠珊（Janice Man）與周柏豪相識於青葱歲月，當年以model身份躋身娛樂圈，型男索女外形襯到絕，偏偏兩人友情太深，做不成戀人，柏豪笑稱想到與JM拍拖有點「反胃」，又笑兩人有共通點——低低BB。不過，Janice自爆當年為撐柏豪出任MV女角，惹來當時的男友醋意大發。
18歲貪型 揸二手紅跑
JM：我識你嗰時得14、15歲，你有冇印象？
周：梗係有，你咁靚女，你嗰時未箍牙，仲有兩隻爆牙好得意，所以特別記得。其實你未識我之前，我喺網上啲美女貼圖區已經睇過你啲相，你啲相長期高踞頭三位，好出名o架 你！
JM：吓，你有睇，都冇聽你講過，仲以為同一間公司你先識我，冇諗過原來之前已經留意過我添，哈哈，你咁留意我又冇追我喎？
周：呢個……點解呀！因為有啲人係做朋友會仲適合囉。
JM：即係我唔夠吸引啦！
周：唔係，係感覺上唔係嗰樣嘢，咁做呢行個個都吸引，個個都靚女，點解唔去追？可能畀我姊姊、妹妹同好朋友嘅感覺，而你畀我感覺似妹妹囉。坦白講，每年你嘅生日我都記得，一啲開心嘅日子都記得你o架 ，你喺我朋友圈子裏都佔一個重要席位，你計下我哋都係廿幾歲，但就識咗11、12年，算好耐啦。
JM：其實我哋都算有緣，當年大家做model時入埋同一間公司，幾年後你做咗歌手，我就去拍戲，工作上係少機會合作，但大家又keep到份友情，識於微時係唔同啲。
周：嗰時係朋友介招拍廣告，第一個係鑽石廣告，一個鐘500蚊，嗰時我17歲，真係覺得好多錢，之後有人搵我casting，啲job開始多咗，自己唔煙又唔酒，所以考到車牌就即刻買車囉，18歲有架車，仲唔當自己係車神咩。
每次只入50蚊油
JM：我記得……你有載過我，嗰架就係你第一架車？
周：係呀，紅色跑車，不過唔係法拉利，哈哈係二手車……用九千蚊買番嚟，新牌仔係呢啲車啦，幾十萬嗰啲買唔起呀，嗰時做模特兒收入唔穩定，買咗架車就冇晒錢囉。
JM：入油都冇錢？
周：你講得啱呀，50蚊、50蚊咁入囉，入到連油站阿姐都認得我，你話幾咁窮。（真係入50蚊？）係呀，入完50蚊一撻車匙個油錶仍然着住紅燈。就算有人問，我咪話油少啲、車身輕咪慳油啲做藉口囉，實質係冇錢，試過行到冇油要推架車入油站，好彩坐隔籬係個男仔啫。
JM：咁你就咪買車啦，性格就係咁，要扮型。
周：你要知道18歲有車係幾威幾型，唔係為型，點會揸架紅色車，唔通18歲會同你講，我揸車係想感受聽風嘅感覺咩。
合作MV 男友呷醋
JM：諗諗吓我哋合作唔多？
周：你唔記得我第一張碟嗰首《六天》嘅MV，你幫我做女主角咩，係講你為咗另一個男仔放棄咗我！（哼起《六天》其中一句歌詞：從來沒我份……）你為咗個健碩男仔放棄咗我。
JM：你仲咁講……乜你唔記得MV背後有個故事咩，我幾經辛苦幫你拍o架，個故事同個MV幾似添。
周：我記得嘞，有人唔畀拍……
JM：我掙扎好耐拍唔拍好o架。
周：有人呷醋囉！
JM：嗰時大家都細個嘛，小朋友囉，咁我都想支持你，又未拍過你嘅作品，所以，最後我都幫你拍就係咁解！估唔到事隔五、六年，喺幾個月前又接到你電話，搵我拍你首新歌《我的宣言》MV，但因為我撞期拍唔到，你搵咗第二個拍，我有睇個MVo架，入面有場咀嘴戲o架。
周：係呀，原本諗住益你o架！講真，個MV自己做埋導演，現場有同個model商量過，都覺得求婚完個位應該錫嘅。
JM：咁我都係專業演員，劇情需要我唔介意，只可惜我個期唔得囉，下次啦。
周：其實真係同你太熟，幻想我哋拍拖都有啲反胃，咁熟拍咀戲我真係唔得，情願同個唔熟嘅。不過，我同你有個共通點，平時都係低低BB。
JM：我邊低B呀！
周：吓，有鏡頭對住就唔低B？……好啦，好啦，咁你低A啦。
JM：點都好啦，上年你開咗第一個個人演唱會，我真心戥你開心，嗰晚我諗住嚟睇騷，冇乜準備，點知被人叫咗我上台獻花畀你，我個心不知幾慌。
周：我真係唔知你會上台，所以，係好開心嘅。
人肉速遞飯盒
JM：幾時喺紅館開？
周：明年，你要再嚟睇，放心唔會叫你唱歌。
JM：你開到聲做乜都得啦，睇吓我對你幾好。
周：既然係咁，如果你有日突然好肚餓，我又得閒，我咪人肉速遞盒飯嚟畀你囉，但我送完就走o架啦，你記得畀番飯錢我喎！
JM：我哋好似一家人嘛，好難得o架，要珍惜。
周：大家由當年乜都冇，乜都唔識，到依家做到自己想做嘅嘢，生活得開心，健康又唔錯……
JM：你依家唔使入50蚊油啦？
周：入100蚊油咋，要繼續努力啲先。
JM：咁我祝你架車個油燈唔使再長着啦。
後記
男女間確實可以有「純友誼」關係，看JM和周柏豪由外形到嘴形都相當啱key，偏偏兩人只「撻着」友情，而非愛情，就是所謂「有緣冇分」，或者兩人認識時間太久，現在先來改變關係去跳到愛情關口，相信JM和柏豪能夠輸得起愛情，但卻不願輸掉一份真摯友誼，做朋友好過做情侶。
Jancie Man
服裝：Sportmax
化妝：Omix B
髮型：HeiLee@Xenter
文：高美美
攝：沈健程
場地：都會海逸酒店