Niki風騷頸留印 嘉穎送祝福

藝人周麗淇（Niki）同DJ葛民輝昨日出席《adidas Originals Superstar 2013秋冬全新系列》，更大騷纖腰同盆骨，但右頸側更驚現古怪「紅印」，Niki大呻最近消瘦不少，問到男友徐正曦可心痛？則甜笑指：「唔識答呀，我覺得女仔要苗條，同有骨感。」

其後又扯開話題指最近勤於運動，又養成食早餐的習慣，問到是否同男友「撐枱腳」？Niki撒嬌地說：「見到會一齊食，但依家相隔千里又點食呢？」

正蜜運中的Niki，談到男友即冧爆甜笑。

Niki與葛民輝同場現身活動。

用普通話受訪

提到日前香港電視不獲發牌，逾300名員工恐飯碗不保，Niki就話：「唔好彩，不過我簽TVB，只可以喺TVB亮相，對我影響唔大。」其後，Niki接受有線電視訪問時，就「離奇」除咪牌兼用普通話受訪。

至於阿葛就透露正籌備明年1月假紅館舉行的「softhard heHA opera」，已到尾聲有機會加場，但未知會否再度爆肌。對於香港電視裁員，他苦口婆心指：「正常吖，大家唔好慌，跳船時要小心啲。」問到可覺政府不聽從民意？阿葛就直言：「由英治政府開始都唔聽，一向都佢有佢講，聽嗰個就唔係政府啦！」更贈王維基一句「塞翁失馬，焉知非福」，期望他先能找到解決方法。

慰問跳槽同事

另外，Niki舊愛鄭嘉穎昨日出席活動時，提到兩位舊愛（Niki同佘詩曼）感情都有「着落」，嘉穎就顯得腼腆，欲言又止話：「好事，開心事，有情人終成眷屬。（幾時到你？）有就通知大家！」

談及香港電視「失牌」，貴為前TVB視帝的他表示：「我好尷尬，驚講多錯多，有人喜歡有人愁啦！」他又透露已慰問不少跳槽去香港電視的舊同事。

文：音樂組