李克勤認老修心養性做宅男
在娛樂圈縱橫了廿多年的李克勤，人前屬於有分量的男歌手，私底下更是廿四孝老公及爸爸的他拒做「怪獸家長」，但年底才46歲的他已經急不及待認老，自嘲是「宅男」的克勤，在演藝生涯中已經嘗過多姿多采的生活，坦言現在最愛瞓覺，不會再讓自己有心野機會。
【拒做怪獸家長】
廿四孝老竇的克勤決不做「怪獸家長」，任兩個兒子挑選他們最愛的課外活動。
你見到我掟個仔去國際學校讀書，就知我不是「怪獸家長」，其實「怪獸」不應該指家長，是個教育制度，你估幫子女報讀課外活動唔使錢同時間？但讀本地學校，當全世界的學生都咁做，如果你仔女唔係咁，可能會跟不上，個小朋友見到其他同學仔學呢樣學嗰樣，但自己無得學都會唔開心，我就係唔想咁。我個小朋友一樣有課外活動，但由他自己去揀，唯一由我安排去學就是游水，萬一畀人踢落海，至少都識游，其他活動我由他自己喜歡而去學。
我大仔雖然都鍾意聽我唱歌，但他更鍾意英國組合One Direction、韓國大叔Psy，三歲大的細仔就鍾意韓國女子組合Rainbow的《Sunshine》，有日他看到電視，他對住我說：「Daddy，I want this。」叫我將個video放入他的Ipod，他都「識貨」o架！再追個女？唔好玩啦，冇心冇力。
【做藝人有着數】
曾為無綫拍過幾齣劇的克勤，急住認老表示已捱唔到……
其實我沒有任何電視台合約，去邊度拍劇都得，但短期內相信都不會返無綫拍劇，雖然我鍾意演戲，但我更鍾意瞓覺，以前拍劇可以唔使瞓覺，當年我們收工，大家仲會約埋去食消夜、卡拉OK，通頂到六、七點又再返工，但依家老了，捱一日通頂，就算瞓番十幾個鐘都補唔番。加上我的小朋友又細，依家我會以家庭為重，就算內地出到好高價，未來這幾年我都不會接劇住，今年我個期都已經排滿，我自己巡迴演唱會都未完，12月就要做「左麟右李」，之後又要開始巡迴。
我係一個好悶的人，可以話係一個宅男，就算娛樂圈多姿多采，要玩都玩過啦，其實做藝人已經好好，拍戲、拍MV裏面有好多女朋友、老婆、在飾演一個角色時做了就算，滿足到平時做不到的事，滿足完就回家，現實生活中最好唔好畀機會自己去心野。
【見證樂壇盛衰】
克勤回顧早年做歌手時收入豐厚，但時移世易，他慨嘆唱片業都要向現實低頭轉型。
我年齡不老，但心態老，在這行做了廿多年，當年我的年代沒有太多經理人、保母，宣傳人員既是保母，仲要做埋司機，一車就兜齊住同區的歌手，好似周慧敏、關淑怡、陳慧嫻，大家的感覺似屋企人，唱片公司辦公室同錄音室又集中一齊，大家好接近。
八、九十年代我們做歌手收唱片花紅張支票好勁，我試過半年收到七位數，但近年唱片市道陷於低潮，因時代已經轉變，在這個過渡期，能夠有唱片推出已經好開心。依家做歌手的收入並非靠唱片為主，歌手可以去拍廣告、拍戲、做騷，尤其是大陸市場好大，每個月可以返內地登台，歌手的收入反而增加，但對唱片公司就真的好大影響，所以間間公司都要轉型，如果單靠出碟早就執笠。
【體力不如阿倫】
今年十二月克勤與譚詠麟（阿倫）舉行「左麟右李」十周年紀念演唱會，他佩服阿倫精力旺盛，令他慚愧。
近年我習慣早上六時就起床，所以平日夜晚十一、二點就睡覺，但年底做「左麟右李」要調校番作息時間，阿倫的精力肯定旺盛過我，他踢波密過一些職業足球員，他鍾意住酒店，因為做完騷他仲要玩，我真的佩服到他五體投地，其實做完一個騷，大部分都攰到「死」，但對阿倫來說還是一日的開始，完騷他最鍾意叫大家去食消夜，上酒店房鋤D，但我做完騷當然返房瞓，真的自愧不如，他有非一般的體力，開騷前下晝仲可以去踢波，唯一不准他做就是「食」，阿倫開騷前要食，完騷後是勁食，阿倫好鍾意玩，鍾意大班人熱熱鬧鬧，只是不愛睡覺，他的特質令到周圍的人都好開心，相反我成日黑口黑面，好似嚴肅，大家見到我都驚，哈哈！
口述：李克勤
筆錄：音樂組
攝影：李柏儒
場地：Bowers & Wilkins
服裝：Fred Perry@ITHK
髮型：Adolph Bow
化妝：Angel Yip