Marcel Nguyen 與潮並進
體壇新星德國體操運動員阮馬素（Marcel Nguyen），憑高超體操技巧，加上靚仔及健碩身材，極速奪取少女芳心。酷愛時尚潮流的他，閒時最愛以shopping減壓，更曾與時裝品牌合作，推出自家T-shirt，半隻腳踩入時裝界，不排除將來成為第二個碧咸！
要數叫萬千少女風靡的運動員，第一個在腦海中閃過的，除了碧咸（David Beckham）、基斯坦奴朗拿度（Cristiano Ronaldo）等靚仔球星外，德國體操運動員阮馬素（Marcel Nguyen）絕對是近年火速上位的新寵。
還記得2012年奧運，於網絡上瘋傳各式各樣阮馬素比賽的相片或片段，大家都大讚他「運動又叻、又大隻、又靚仔」，迷倒萬千少女。先後兩度來港的他，每次均吸引大批粉絲慕名而來，希望一睹他的風采，與他作近距離接觸。而他所到之處，定必有數十粉絲拿着寫有他名字的紙牌，歡迎他來臨。他對此印象深刻，更笑言香港粉絲非常熱情，令他留下美好回憶。「我好開心有機會同佢哋見面，佢哋同我講加油，會繼續支持我，我真係好開心。」雖然他於體操場上，舉手投足都散發過人的自信及魅力，可是，對於粉絲不停大讚他靚仔、大隻時，他卻會突然變得怕醜起來。他更腼腆地說：「其實我冇乜特別，只係一個普通嘅男仔，都冇話特別滿意自己邊一個部分。」
最欣賞碧咸
阮馬素坦言心目中最欣賞的男性是碧咸，不但球技了得，並於球壇深獲尊重，同時又活躍於娛樂、時裝界，不但拍攝廣告，又創立了自己的潮流品牌，最重要是他同時亦是一個好爸爸，無論公事、私事都處理得非常好。以阮馬素的俊俏，以及受歡迎程度，要與碧咸齊名看來沒有太大難度。事實他亦跟碧咸一樣，成為時尚潮流界寵兒，被不少品牌相中，挑選他成為代言人，而且他亦與時裝店合作推出自家T-shirt，已有半隻腳踩入時裝界。他笑言：「其實係我啲粉絲話想買我嘅產品，咁啱又有時裝品牌搵我合作，所以就推出咗T-shirt。雖然啲衫唔係我設計，不過我都有畀意見，我好鍾意啲款式。」
至於將來會否全力進軍娛樂圈？阮馬素不置可否地說：「暫時唔會住，不過why not？我都好鍾意嘗試唔同嘅嘢，不過可能遲啲先。我依家都仲係會將全副心機放喺體操上面。」但如今他成為當紅炸子雞，廣告及代言活動都忙得不可開交，有時候甚至要到其他國家工作，直接影響他的訓練進度。「我平日每日都訓練六、七個鐘，不過如果我有其他工作要做，而搞到練唔到嘅話，我就惟有返去之後練番長啲時間，補償番。」在有限的二十四小時裏，要同時兼顧事業、家庭、愛情、友情，絕不簡單。
以濕平減壓
別以為阮馬素是完美的，他自爆有時約會或練習亦會遲到。「不過我真係好珍惜同朋友及家人相處嘅時間，佢哋係我減壓嘅良方。但因為我屋企人住喺另一個城市，所以冇辦法成日見面，最多只係得周末可以見，不過我都會每日打電話畀媽咪，同佢傾吓偈。」而他的另一個減壓方式，就是shopping！他笑言對潮流時尚很有興趣，閒時就會去逛街，添置衫、褲、鞋、襪；就算沒有時間外出，也會瀏覽時裝網頁，網購心儀產品。難怪他無論於運動場台上，或是台下，都同樣發放迷人光彩。
代言腕錶
貪靚的阮馬素透露自己閒時多以運動服或悠閒打扮外出，但在重要的場合，當然會悉心打扮一番。着重細節的他，連手錶也會刻意配襯，可謂一絲不苟！剛出任瑞士依波路（Ernest Borel）腕錶全球代言人的他，更驚嘆品牌與體操之間有不少共通點，並說：「於體操場上，每個動作均講求精準、優雅和技巧，對於時間的掌握亦非常重要。」
人生低潮
阮馬素於2012年奧運勇奪體操男子個人全能比賽及體操男子雙槓比賽的銀牌，是目前第三名德國運動員獲得奧運男子個人全能比賽獎牌的人，風頭可謂一時無倆，但他亦曾經歷低潮：「喺2010年，喺我準備參加鹿特丹世界錦標賽之前兩星期，因為腓骨受咗傷，所以參加唔到賽事。最後我啲隊友贏咗銅牌，我就冇得同佢哋一齊出賽，真係好傷心。不過我啲隊友好好，不斷鼓勵我，又成日話畀我知佢哋嘅比賽情況，等我覺得同佢哋共同進退。真係好多謝佢哋！」