嘉玲撐偉仔 金馬sure win

第五十屆金馬獎頒獎禮將於下月舉行,今年影帝競爭激烈,前晚劉嘉玲出席活動時就力撐有份角逐的老公梁朝偉勢必封帝,自言是老公粉絲的她若是評審,定頒影帝獎項給他,雖然嘉玲也欣賞候選的梁家輝,她說:「佢遇上偉仔就唔好彩!」撐老公撐到出面。

嘉玲前晚出席香港版HARPER'S BAZAAR 25周年慶典,對有傳她與梁朝偉婚姻現危機,偉仔找好友吳廷燁訴苦,嘉玲聞得有關傳聞帶笑反問記者:「佢講咩你哋都聽到咁犀利?佢同吳廷燁成日都睇戲食飯。(佢冇事?)我唔知喎,你哋要問有關王菲同偉仔嘅嘢應該問番佢哋兩個,我唔係佢哋代言人。」

從台灣禪修返港的偉仔跟嘉玲表示這是件很舒服的事,嘉玲羨慕之餘揚言一定要試試,她已能忍到三日獨處不說話:「我唔怕悶,一個人都好自在。以前後生時鍾意熱鬧要搵朋友,其實有時間同自己傾偈可以沉澱啲雜質同雜念。」

「宗師」大殺四方

偉仔憑《一代宗師》角逐今年的金馬影帝,屆時嘉玲會陪偉仔出席:「部戲有好多提名,應該會大殺四方。(對偉仔有信心?)我係王家衛同梁朝偉fans。(《寒戰》嘅梁家輝同《激戰》嘅張家輝,邊個威脅到偉仔?)有冇野戰?哈哈。如果我係評審就好喇,影帝個獎梗係畀梁朝偉啦,本來梁家輝就攞硬嘅,我好鍾意佢喺《寒戰》嘅演出,但佢撞到Tony Leung(偉仔英文名),咁就冇辦法,佢唔好彩!」另外,對於梅艷芳遺物被平價拍賣,嘉玲坦言心裏不舒服,認為應設博物館展覽紀念。

同場的還有名模琦琦、陳嘉容及Do姐鄭裕玲、郭富城、歌手林憶蓮,Do姐對於有傳無綫不准《星夢傳奇》的藝人外出接job,認為節目改變了很多人一生,做完節目已出晒名,就可以出去接job。而對於今年視帝改回專業評審制,她謂是好事,不會不公平。

文:名人組