鄭敬基 李麗珍 拍拖趕客驚動警察

李麗珍、鄭敬基前晚於中環為無綫劇集《M Club》拍攝外景，二人拍攝拍拖夜蒲的戲份，由於現場是一間「私竇」餐廳的門外地舖，期間餐廳內有兩名外籍職員走出來，投訴劇組的燈光影響他們的生意、客人，期間更不斷於鏡頭前擾攘，影響劇組拍攝，雙方隔了多時都傾不掂數，事後餐廳職員報警，雖然無綫一早已作出申請拍攝，亦有向警員出示文件，而警員到場了解後亦離去，不過兩位外籍職員仍感不滿，繼續阻礙拍攝，個多小時後，劇組為免嘥時間，最終都頂唔順轉場拍攝。

咀足個幾鐘

事後鄭敬基坦言曾一度幫口游說職員，但對方很堅持，故都不成功，他又笑言視李麗珍為「女神」，能跟她合作都感開心，他謂：「之前都拍咗接吻戲，仲一咀咀咗個幾鐘，本來導演要求一嚟就激咀，但我向珍妹要求慢慢嚟，由左邊嘴開始錫，（有冇準備？）有，有用漱口水，拍時都冇尷尬。」他更指自己入行廿幾年，螢幕初吻就獻了給女神，更大讚對方拍咀戲非常專業。

分享漱口水

而李麗珍入行多年，對於有人阻礙拍攝，坦言是小兒科，對於鄭敬基指被她奪走了螢幕初吻，她聞言即謂：「唔會啩！唔好信佢，不過拍時我都冇乜準備，唔記得帶漱口水，咁都好，可以試新嘢，因為鄭敬基帶咗新嘅漱口水。」她透露此劇拍至月尾，之後會休息暫不拍劇。

文：影視組