鄭敬基 李麗珍 拍拖趕客驚動警察

李麗珍、鄭敬基前晚於中環拍劇時受到阻礙,更有警員到場了解,不過二人見慣大場面,不覺是甚麼一回事。鄭敬基更透露「螢幕初吻」已獻給女神李麗珍,李麗珍則笑言拍攝前沒有準備,但就試了「新嘢」!

李麗珍、鄭敬基前晚於中環為無綫劇集《M Club》拍攝外景,二人拍攝拍拖夜蒲的戲份,由於現場是一間「私竇」餐廳的門外地舖,期間餐廳內有兩名外籍職員走出來,投訴劇組的燈光影響他們的生意、客人,期間更不斷於鏡頭前擾攘,影響劇組拍攝,雙方隔了多時都傾不掂數,事後餐廳職員報警,雖然無綫一早已作出申請拍攝,亦有向警員出示文件,而警員到場了解後亦離去,不過兩位外籍職員仍感不滿,繼續阻礙拍攝,個多小時後,劇組為免嘥時間,最終都頂唔順轉場拍攝。

咀足個幾鐘

事後鄭敬基坦言曾一度幫口游說職員,但對方很堅持,故都不成功,他又笑言視李麗珍為「女神」,能跟她合作都感開心,他謂:「之前都拍咗接吻戲,仲一咀咀咗個幾鐘,本來導演要求一嚟就激咀,但我向珍妹要求慢慢嚟,由左邊嘴開始錫,(有冇準備?)有,有用漱口水,拍時都冇尷尬。」他更指自己入行廿幾年,螢幕初吻就獻了給女神,更大讚對方拍咀戲非常專業。

分享漱口水

而李麗珍入行多年,對於有人阻礙拍攝,坦言是小兒科,對於鄭敬基指被她奪走了螢幕初吻,她聞言即謂:「唔會啩!唔好信佢,不過拍時我都冇乜準備,唔記得帶漱口水,咁都好,可以試新嘢,因為鄭敬基帶咗新嘅漱口水。」她透露此劇拍至月尾,之後會休息暫不拍劇。

文:影視組