梁家輝：好過放喺度發霉
梅艷芳的遺物被公開拍賣，圈中不少藝人就此都有不同感受，當中贊成及反對各有聲音，惟對其家人的高調舉動則不願置評。
梁家輝：阿梅走之前已經好理性去委託銀行幫佢處理遺物，供人競投作收藏都總好過放喺度發霉，依家拍賣後得番嚟嘅錢又可做善事，相反賣得嚟嘅錢只係畀佢家人唔係惠及大眾，反而唔係阿梅嘅原意！阿梅留畀我嘅係一份愛做善事嘅精神，好似今年佢生忌當日，我正喺北京做慈善活動，當時我又負傷，又唔係有錢賺，但當我諗起係阿梅嘅生忌日子時，就特別覺得有意義。
關錦鵬：生不帶來，死不帶走！今次拍賣嘅收益係畀基金做慈善，秉承咗阿梅嘅精神已經OK啦！因為阿梅生前已經送咗好多親筆簽名嘅黑膠碟畀我作紀念，所以我唔需要競投佢嘅遺物。
陳煒：好唔贊成梅姐嘅遺物用咁平嘅價錢拍賣，點解唔去搵一個地方將阿梅嘅遺物作展覽，收入場費咪可以去維持個基金囉！我扮演過梅姐生前好多個造型，梅姐對我嚟講有好深嘅感受。
蘇永康：其實一早搞得掂就唔使拍賣，但事到如今已經冇得改變，依家咁樣係最好嘅辦法。相信去得競投嘅人都係梅姐忠實fans，投得遺物後會好好保存。
劉培基：「聽到呢個消息好開心，好多謝志偉，不枉阿梅生前視佢哋為好兄弟。」但得知11隻金及白金唱片被另一歌迷林先生以60萬投得，他驚訝謂：「咁高價呀？我諗呢位先生好鍾意阿梅先會用咁多錢投唱片，我唔覺得遺憾。」他又說如志偉需要他捐出阿梅服飾作12月展覽之用，一定會幫手出一分力。