張繼聰開騷 囝囝high到曉飛
張繼聰舉行個人音樂會，獲全家到場支持，其中兒子張瞻更成為台下焦點，「冇時停」的他全晚在媽媽謝安琪（Kay）和爺爺身邊手舞足蹈兼表情多多，阿聰的死黨方力申更童心大起，抱起張瞻玩空中飛人，嚇得外婆立即出言阻止。
歌手張繼聰前晚在九展舉行個人音樂會，已有數年沒有開騷的他，獲父母、外母、太太謝安琪和囝囝張瞻在台下支持，而一眾劇集《老表，你好嘢》的演員包括王祖藍、王菀之、郭晉安等亦有現身，王祖藍更帶同女友李亞男拍拖捧場，而同門的鄒文正、AOA和農夫的陸永則擔任表演嘉賓。台下看着爸爸演出的張瞻十分活潑，阿聰演繹快歌時亦跟隨手舞足蹈，又走到王祖藍和方力申身邊，小方更忍不住抱起張瞻將他拋起，嚇得Kay的媽媽立即阻止。
當眾晒T-back
近來狂操體能，練得一身肌肉和人魚線的阿聰，甫開場即獲台下的觀眾和好友大叫，要求他除衫騷肌肉，阿聰聞言就笑說：「人人都睇過我除衫啦，不如特別啲除褲啦。」觀眾即刻大聲歡呼，然後阿聰就轉身背對觀眾從褲中抽出一條道具T-back，並拋給前排觀眾，場面搞笑。
玩完T-back後阿聰又大晒溫情，透過歌聲冧家人，並將囝囝和太太日常生活照剪輯成短片播放，談到太太，他說：「同佢一齊感覺就好似坐埋同一架車，期間經歷好多風吹雨打，依然都仲喺一齊，我到今時今日仍對佢有心跳感覺，記得第一次見佢嘅情況。」螢幕隨即影住台下的Kay，她亦感動得向台上飛吻，場面感人。
偷偷摸摸剪片
完騷後受訪的阿聰表示近來忙於拍劇和準備演出，故此即使每日只得幾小時休息亦要抽時間製作短片，他說：「返到屋企整相要偷偷摸摸，因為想畀驚喜老婆。」另外，雖然無綫已公開表示無阻止旗下藝人用廣東話接受其他電視台採訪，但和無綫簽下藝員約的阿聰，接受有線訪問時依然使用普通話。
文：音樂組