Kelly攀石斷繩 墮地Chok傷
陳慧琳（Kelly）早前飛往布拉格與影帝梁家輝拍電影，家輝首日開工已出意外斷肋骨，Kelly前晚則自爆拍攝攀石戲時，因安全繩突然斷掉，令她從一米高跌下，幸好只是Chok親，但已嚇得她急急拜神上香。
陳慧琳、劉心悠及李治廷（Aarif）等前晚出席MARC BY MARC JACOBS舉行之「Endless Summer Concert」活動，剛為一齣電影配音的Kelly，被問到知否拍檔梁家輝在布拉格拍該片的外景時發生意外斷肋骨，Kelly說：「知，當時唔喺現場，我一到埗就知佢出意外入咗醫院，嚇到我傻。」她又讚家輝專業：「佢隔一日就開工，仲搏晒命咁跑，我好驚，不停叫佢唔好郁。」
冇大礙即拜神
Kelly透露自己在室內攀石牆取景時亦發生意外：「我落地時，喺離地一米左右，條安全繩突然斷咗，好彩地下有軟墊。驚到我吖，即時去拜神上香，都Chok親少少，好彩斷繩前拍晒爬上爬落嘅戲。（買重保險？）冇用啦，綁多幾條安全繩好過。」
對於無綫表示歌星合約中沒列明不准歌手以廣東話接受其他電視台訪問，與無綫沒歌星約的Kelly說：「當年冇睇有冇列明，都係睇唱片公司安排，大家尊重。（支持用廣東話受訪？）支持，簡單好多。」
李治廷愛冰冰
前晚劉心悠到場時差點仆倒，她透露想做素食者，問擔不擔心不夠體力跑馬拉松？心悠表示：「唔關事，可以食麵同飯，其他食物都有肉類嘅蛋白質。」同場的Aarif被問到與范冰冰的緋聞，他承認與冰冰在銀幕上很有默契及愛，問兩人私下是否很有愛？Aarif問非所答：「佢睇完我今（前）晚訪問，一定喺微信笑我。」
採訪：音樂組