陳豪搏殺爭獎 杏兒愛新方向
有份憑劇集《法外風雲》角逐今年視帝的陳豪，昨日聯同胡杏兒及黃翠如，在馬鞍山為劇集《陪着你走》拍攝節目巡禮片花，不停搵奶粉錢的陳豪要孭着飾演盲人的杏兒在海濱長廊浪漫散步，二人又在沙灘談情說愛，十分浪漫﹗前晚在無綫亮燈儀式上被鄭裕玲追問ＢＢ性別的他表示不會尷尬：「都慣咗，知道啲人關心我，不過都係遲啲先啦。（老婆陳茵媺預產期？）都係遲啲先。（休息陪入產房？）我都想休息，都多嘢做。（減少工作時，老婆就生得？）唔係嘅。」
有指杏兒和舊愛黃宗澤翻撻，杏兒表示：「冇啲咁嘅事，應該要有新方向、新發展。（咩新方向？）就係不斷同工作談戀愛，一定唔會分手。（追求者？）真係冇。」談到無綫主席梁乃鵬表示所有合約歌手及藝人都可在其他電視台以廣東話接受訪問，杏兒說：「最緊要梁博士話ＯＫ。」另外從有線過檔的黃翠如談到陳法拉接受有線訪問時要求拆咪牌，表示會尊重無綫，並先諮詢公司意見。
