林峯返BB香閨 夜語癡纏
無綫小生林峯自從戀上年輕14載的吳千語後，愛得癡纏如同中「BB降」，加上今年轉戰內地搵真銀，於無綫冇劇上，林峯前晚連電視台亮燈儀式亦冇份出席，明知今年角逐視帝無望，林峯寧願孖住千語BB歎日本菜，繼而再夜訪BB香閨。
被視為無綫親生仔的林峯，放棄經營家族生意，奈何多年來努力拍劇衝擊視帝不果，但近年在內地拍劇狂賺「人仔」，賺到盤滿缽滿，此外，自從33歲的林峯去年撻着年僅19歲的影壇新貴吳千語，馬上改變以往低調處理感情事的作風，不時將千語BB掛在口唇邊，愛得相當投入。早前兩人結伴出席千語經理人婚禮，更抱實別人的BB，一副恨結婚生B模樣，難怪拍拖以來不時傳出婚訊。
拖手歎日菜
過去一年心繫千語BB的林峯，轉戰內地掘金，結果一年來零無綫自家製作劇集播出，勢頭大不如前，甚至傳出林峯有意自組公司向外闖，雖然林峯已否認傳言，但明知今年爭視帝無望，一於繼續專心拍拖，陪實千語BB，前晚無綫台慶亮燈儀式，因冇劇上而冇份出席的林峯，被發現陪女友去灣仔食日本菜。
當晚兩人穿上黑色情侶裝，相約數名友人大食魚生和串燒，席上更點了不少清酒助興，林峯和BB全程癡纏地邊食邊拖手仔，兩人和朋友有傾有講食得相當開心，笑聲頻傳，同場有食客透露，目睹林峯陪千語去洗手間，並風度十足地在洗手間外等女友，相當恩愛。
面紅紅打的
至晚上十時半一行人食飽飽步出，只見幾杯落肚的林峯明顯面紅紅，笑到四萬咁口的他拖實千語BB，情緒高漲地和友人站在路邊傾偈，就算有途人經過林峯亦未有避忌鬆開手。未幾千語放開林峯，穿過停泊在路邊的車輛，行出馬路邊，此時只見千語經常乘坐的「BB專用」的士出現，她溫柔地向男友叫了聲：「車到啦！」然後開車門上車，而跟在千語身後的女友人唔識趣地尾隨上車，此時眼見陪住BB的有利位置被佔用，林峯醒目地繞過的士，走去另一邊開車門上車，成功地再黐實BB。的士直駛去千語BB位於中半山的香閨，無心戀戰爭視帝的林峯，漫漫長夜有BB相伴，一樣冧到爆。
文、攝：追蹤組