周秀娜狂摑20巴 Kelvin愈痛愈high
周秀娜（娜姐）近日與關楚耀（Kelvin）以「緋聞男女」姿態頻頻爆光，昨日娜姐更自薦為Kelvin新歌MV做野蠻女友，為新歌《你永遠是對的》MV做女主角，昨日兩人在酒店房內取景，但並非拍纏綿戲份，而是兩人互相推撞的鬧交戲，Kelvin更慘遭娜姐出手喪摑臉頰。
問到娜姐喪摑感覺爽不爽？娜姐坦言：「摑到手痛，摑咗廿幾巴，啲男仔見到我咁，乜幻想都冇晒啦。」問到可有纏綿鏡頭？她笑言：「冇啦，呢個已經肌膚之親咗廿幾次啦。」娜姐稱連導演都讚她愈摑愈純熟，打到Kelvin有火。
突降呢「好兄弟」
至於被打的Kelvin笑言：「畀娜姐打OK嘅，打到有Feel，好High。」並謂這場掌摑戲份是專登安排給娜姐，因知她工作壓力大，讓她好好發洩一下。Kelvin謂：「我仲叫佢落足力打，點知佢真係毫不留力，有一下真係痛到呆咗，經過今次了解，知道娜姐好『揪』得。」娜姐則謂「好兄弟」沒所謂。
早前娜姐曾言與Kelvin正是「了解當中」，為何現在變了「好兄弟」？娜姐竟說：「不嬲係好朋友，好兄弟呀。」Kelvin可有失望？Kelvin只得說：「冇失望，一直都係朋友。」
文：音樂組