香香食道具餸認慳家
昨日出版的《好報》踢爆岑麗香由女神變身「慳神」，為儲錢圓業主夢不惜日用50蚊，平日戒掉行街睇戲等娛樂，更不介意食道具飯餸醫肚，她昨日受訪時直認慳家，並表示買樓是她其中一個目標。
岑麗香與張兆輝主演的新劇《神鎗狙擊》正在熱播，戲中香香的33C逼爆身材仍是焦點所在，其女神地位穩如泰山，現實中她卻由「神級」變身「乾物女」。
父母教落打包
有傳香香自《巴不得媽媽…》後成功吸金近400萬，《好報》昨報道，為儲錢買樓香香勁慳，日常生活厚住面皮黐車黐食，每日限自己只得50元零用，三餐以清簡為主，更鮮有上街購物。有幕後工作人員表示：「香香好乖好慳，出晒名連道具飯都照食，食唔晒仲會打包。」日前香香就於微博表示自己正享用一碗放了兩小時、已發脹的牛腩麵。
對於被指慳錢置業，香香昨受訪時不諱言：「食道具飯餸？睇你點睇，如果明知嗰日拍飯戲係有好嘢食，我會留肚。我有打包，呢啲係父母由細教落嘅。（食發脹麵？）嗰日拍外景，知道附近有間牛腩麵好出名，咪買上外景車食。我係慳，儲錢買樓係我其中一個目標，但暫時連首期都未有。」
張兆輝揸波子
至於張兆輝被盛傳身家達半億，事關他與太太經營的美容生意做得有聲有色，當中不乏周潤發這些星級客仔。住貝沙灣的輝哥日前就被《好報》拍得揸價值約200萬的保時捷跑車，單拖現身中環掃自然療法產品。據悉，輝哥一早已有實力換車，但怕太高調才心大心細，直至最近終換掉過往的舊款平治改揸波子。
文：影視組