羅霖企硬報警追$37,000

前亞姐羅霖早前與丈夫劉坤銘鬧離婚後，在上月她48歲生日時，筵開16席大搞羅霖「真愛」生日會，原本開心慶牛一，豈料又捲入錢債糾紛。事緣當天生日會中，羅霖影迷會中百多位由中、港、台三地會員亦有出席，並每人科款三百元加上之前的結餘合共三萬七千多元，作為替她大搞生日會的資金。而當日羅霖在宴後先行以信用卡墊支十多萬元埋單，據知約兩星期後她向影迷會莫姓前幹事收回三萬七千多元不果，對方先透過女兒表示身體抱恙無暇處理，但最終卻去如黃鶴，不知所終。

警建議搵律師

其後羅霖影迷會在Facebook及微博發聲明呼籲對方現身，否則可能有進一步行動，其後該名前幹事透過一名台灣影迷透露自己老公在澳門輸掉十多萬元，更威脅如果羅霖再有任何追數行為，就會公開她前夫在Facebook中「唱衰」她的私人對話。羅霖影迷會日前到尖沙咀警署報警求助，但警方以他們影迷會並未有註冊為由，建議他們搵律師，或到小額錢債處追討，令羅霖十分煩惱。

昨日記者致電羅霖，她坦承此事：「年幾嚟好多是非，原本好朋友（前幹事）都變成咁，媽咪都話要幫我打小人。但係今次係好多會員夾出嚟嘅錢，點都要幫佢哋追番個公道。」她又指影迷會成立至今3年多，約有100名會員，自己少於幕前演出，所以彼此的關係更似朋友。當問到會否擔心被「爆大鑊」時，她語氣從容：「一啲都唔驚，冇嘢畀佢爆，我同前夫都好耐冇聯絡。（爭撫養權問題？）已經交晒畀律師處理。」

獨立唔使受氣

另外，羅霖前晚現身晚宴支持鄭明明榮獲授勳「銅紫荊星章」，她知道明明姐身體不太好，故會送人參給她。又透露剛才乘的士時被女司機啟發：「佢六十幾歲，話個仔喺美國，嗰度經濟唔好，所以努力搵錢買樓畀個仔，我覺得佢好偉大，今年我有好多挫折會更加努力。」提到剛過去的中秋節是她離婚後首個中秋，會否特別感觸？她感慨表示：「唔只中秋，每一個佳節都係，但我有屋企人同仔，婚姻生活唔係全部。」她明白女人一定要獨立要有工作，不能與社會脫節，別以為嫁個好老公就不用工作，否則會有很多狀況出現，做一個獨立的女人就不用吞聲忍氣，更要與時並進。

文：專案組