千語翹柏豪 懶得備案
吳千語與周柏豪這對前緋聞男女再度同場，為時裝品牌行騷時翹到實，千語表示不需要跟男友林峯備案，男友也是做這行會明白她是為了工作。而同場還有她戲中的老公林德信，千語坦言大家感情不錯，男友亦沒有呷醋。
曾傳緋聞的吳千語與周柏豪已非首次同場，前晚兩人齊為英國時裝品牌Ted Baker行騷，影相時更翹到實。提到二人再度同場合作，柏豪笑說：「頭先我見到佢已經話『又係你囉』！（厭喇？）唔係厭，呢行好細。」而千語則笑言：「厭呀！」問千語跟柏豪同場可有跟男友林峯備案？她說：「唔使嘅，做嘢啫，佢都係做呢行，會明白。」柏豪就解釋說：「大會要求我哋一對咁出嚟，我喺後台都有問佢有冇備定案。（你驚呀？）唔係驚，係尊重，做嘢啫。我唔驚再傳緋聞，只係驚今日對鞋會跣親。（你主動搭千語膊頭？）係大會要求我哋要有啲互動pose。」另外，昨日網上瘋傳一張男女拍AV三級意淫照，男主角疑似柏豪，他透過公司回應說：「唔係我嚟，依家日本AV都咁潮，都有柏豪頭。」
指林德信有女人緣
同場還有在賀歲片中飾演千語老公的林德信，千語說：「拍戲時好快熟咗，大家係朋友，同佢感情幾好。（佢好多緋聞，你唔驚？）係咩？真係唔知，咁犀利？佢好有女人緣，因為佢性格好好，開工時啲女工作人員都好鍾意佢。（男友有冇呷醋？）冇，我哋都冇親熱戲，又冇床上戲，係好溫馨嘅。」
Cara未知胎兒性別
另外，懷有4個多月的模特兒Cara G.就與老公Jesper拍拖到場，腳踏4吋高踭鞋的Cara說：「淨係工作先着高踭鞋，平日着平底鞋。（知道BB係仔定女未？）要過多一、兩星期先知。」Jesper就表示對即將做爹哋感到興奮，但Cara就踢爆老公說：「佢好驚就真，因為第一次湊BB咩都唔識。」
文：名人組