糖妹人矮志氣高撩古仔談情
唐詩詠於新片被型男古天樂欽點做女友，雖然戲份未及女主角李心潔，但面對古仔與劉青雲兩個Man爆男人穿上消防裝演戲，眼球已相當滿足，至於糖妹則自嘲因身高問題，未能實現兒時志願當消防員，不過迷上古仔的她，揚言希望他日能於電影中與對方談戀愛。
唐詠詩、糖妹、小肥等日前齊齊相約觀賞寰宇新作《逃出生天3D》，眾人更於戲院「4D D-Box動感座椅」上感受一番，當播至火海吞噬、爆炸、地塌等場面時，動感椅均會隨之震動搖擺，儼如置身當中環境，故糖妹、小肥等人也睇到咿嘩鬼叫，但看到青雲、心潔、古仔及詩詠經歷火海逃生後相擁場面時，他們又被感動得流淚，相當感性。
如置身現場
首次坐動感椅觀賞電影的詩詠表示：「以前睇戲會幻想個畫面，依家可以感受到，好似升降機跌落去嗰幕，十足置身現場咁！（覺得同古仔對手戲少？）都ok，好鍾意同古仔講電話嗰幕，拍之前導演畀我睇古仔段片，當時已經忍唔住喊，頭先睇就忍住，因為要睇自己邊度做得唔好。」眼見古仔與青雲的型仔消防造型，詩詠笑言也希望一試，問到嬌滴滴的她可有體能應付？詩詠謂：「呢方面演員好犀利，去到現場你就會勝任。」
小肥識做戲
至於身為古仔與青雲粉絲的糖妹則睇得肉緊，惟工作關係要提早離場，她表示：「好想知青雲最後有冇事！等上映再入場睇多次，其實個故事都幾反映人性醜惡，睇完有得着（有冇令你想演消防員？）有呀！細個志願係做佗槍師姐同消防員，但因為身高問題做唔到，不過下次安排我做古仔女友或佢個女都oko架！」至於演保安員的小肥，則自嘲樣子戇直，未能勝任形象英勇的消防員角色，但今次與內地演員藏金生演父子，於對方身上學會不少演技，他笑言：「Paco（黃柏高）睇完話估唔到我識做戲，搞到我都唔知畀咩反應好！」
文：影視組