鄭中基 阿Lo 齊做愛妻號
鄭中基前晚孖住老婆余思敏相約好友衞志豪等到中環晚飯敍舊，席上見一眾男士傾得甚為投契，在旁余思敏則靜靜地望住老公。至於另一對恩愛夫妻林曉峰與康子妮，前日就齊到中環行街睇衫。
現年41歲的鄭中基（Ronald），自從與前女主播余思敏結婚後，已修心養性不少，加上又榮升了爸爸，近年還密密接拍電影搵奶粉錢照顧妻女。近日忙於拍新戲的Ronald，前晚趁住不用開工，撇下愛女與老婆到中環一間餐廳，與衞志豪等男友人食飯敍舊。
向來好杯中物的Ronald，當晚罕有地沒有飲酒，枱上只放了幾杯清水，期間見眾人有傾有講，愈講愈興奮的Ronald，不時手舞足蹈，席上唯一女士的余思敏，全程在老公身旁靜靜地望住他一舉一動，甚少插嘴，認真識做。期間有一名外籍男子經過餐廳，看到大批記者拍照，即好奇問記者，之後還入內與Ronald和衞志豪影合照，兩人任影唔嬲。過往是排骨仔的Ronald，被問到近期臉頰圓潤了？他搞笑地說：「冇計啦！人到中年係咁上下喇！」
齊齊有收穫
至於另一對恩愛夫妻林曉峰（阿Lo）與康子妮，前日同樣撇下兩名兒子，拍拖到中環行街shopping，期間見他們進入了該處一間中價時裝店睇衫，當老婆在女裝部挑選新裝時，阿Lo全程陪伴左右，即使要講電話，都是站在老婆身旁寸步不離。阿Lo見老婆仍未揀完，之後自己去睇男裝，不一會已揀下心頭，就阿Lo搵番仍在血拼中的老婆齊齊往排隊付款。
文、攝：追蹤組