蔡少芬等上市 曹永廉鋪後路
「花無百日紅」，不少藝人都深明此道理，做好演藝事業同時亦為自己鋪定後路。蔡少芬（Ada）和曹永廉昨日就分別為其童裝品牌和食肆開幕，齊齊榮升老闆！二人都碌爆人情卡請來多位圈中好友撐場，Ada希望將來生意能夠上市，而阿廉亦表示會開分店，二人實行在商界大展拳腳！
蔡少芬昨日在金鐘為自己設計的童裝品牌「童夢工場」舉行加盟儀式，兩個愛女和老公張晉、吳啟華、陳慧珊、宣萱、洪欣等亦現身支持。首次做生意的Ada表示聽到別人稱呼她做老闆娘就十分興奮：「同兩個朋友夾份投資7位數字，我要再努力啲搵錢，下季要開分店，希望生意做到上市。（老公打本？）係一家四口一齊投資，一家人冇分你我。」
談到Ada日前到內地工作疑似遭綁架，Ada即表示不提傷心事：「我已經交畀律師同經理人處理呢件事。（仲會返內地工作？）梗係會！（請保鏢？）呢啲唔係話小唔小心嘅問題，我已經做足分內事。」她表示會教女兒小心拐子佬，又笑言：「仲會教佢哋要做Model嘅責任，唔係冇飯食。」而Ada昨日亦即在微博上宣傳自家品牌，老公亦即轉載支持並搞笑寫道：「蔡總，家屬買衣服有折扣嗎？」
開冰室圓夢
而曹永廉的冰室於同日在觀塘開張，老友黎耀祥、黃智賢、洪天明就到場支持，而他的外父外母姜大偉與李琳琳、胡定欣、陳敏之、佘詩曼、楊怡等亦有送上花牌祝賀。
阿廉表示三十多年前已想開冰室：「不過一直冇諗過去實現，咁啱我阿哥同佢拍檔開餐廳，所以都同佢哋夾份開。」他又表示除了實現心願外，亦讓自己多個選擇：「畀多條路自己行，因為仔女都仲返緊學，搵食艱難，而且又可以畀朋友多個聚腳點。（投資咗幾多？）每人7位數字。」他透露將會在同一地方多開一間食肆：「因為投咗兩間舖，不過仲未諗做咩形式。（諗住開連鎖式食店？）唔敢咁大想頭，雖然做咗生意，不過都係專注演藝事業。（少時間陪家人？）盡量就，唔辛苦搵唔到錢。」
文：影視組