家輝是旦o翕 青雲寸Hyper
憑《激戰》成為亞太影展男主角大熱的張家輝，昨日與劉青雲現身鐘錶展，家輝全程風騷，還不時與青雲寸嘴，難怪青雲亦頂不住，指他攞獎前情緒太Hyper。此外，成龍與楊紫瓊亦出席另一鐘錶活動。
兩大影帝張家輝與劉青雲昨日現身灣仔會展，出席萬寶龍參與首個在亞洲區舉行的高級鐘錶界盛事Watches & Wonders 2013，兩位影帝做訪問，心情輕鬆，還互相寸嘴，逗得大家十分開心。張家輝被問到《激戰》在亞太影展是大熱，家輝表現分外風騷，說：「有幾熱，一賠幾，不過作為演員，鏡頭以外控制唔到，自己放開心情，當係去party交流吓。（如攞獎又再升呢？）我都攞過，不過攞過可以再攞。」
睇好邊個難選擇
而在旁的青雲被問到睇好家輝還是另一大熱梁朝偉？他說：「嘩！好難揀。」被問到他會否學家輝練一身「人魚線」，家輝即插嘴說：「青雲有宗教信仰，佢拜海豚。」青雲即回敬說：「我係拜鯨魚。」而青雲最近孖黃曉明拍戲，被問到Angelababy有否去探班，他說：「冇見過，我真係冇見到佢哋喺一齊。」此時家輝又插嘴：「你即係話人哋分咗手。」青雲無奈說：「佢攞獎前情緒太hyper。」另外，余文樂在昨在微博上載一張他與張家輝、張學友及韓星崔始源、池珍熙的食飯照。
Baby結婚唔使計劃
而同場的Angelababy被問到是否好事近，她說：「唔係，啲人看圖作文，希望大家將注意力放喺工作上。」她又謂男友黃曉明未有求婚。至於是否ready結婚？她說：「結婚都要天時地利人和。（出年有冇機會？）睇吓點，計劃永遠趕唔到變化，依家習慣唔計劃。」又否認男友送車送樓，表示自己工作十年買得起。
此外，楊紫瓊則以代言人身份出席腕錶Richard Mille的酒會，成龍與老闆Richard Mille十分熟落，亦專程來捧場，他逗留半小時，先行離開。
文：名人組