金剛冧蕊蕊辣到入心
金剛、蕊蕊首次以情侶檔上遊戲節目，更封女友為「自己人」，但錄影時就被獎門人曾志偉處處刁難，先寸爆金剛花心，再罰他們齊食辣壽司，金剛更借機指女友在他心目中「好辣」。另外，志偉表示已答應為好友林錦堂扶靈，又指有意斟張衞健回無綫拍劇。
藝人金剛、蕊蕊、曾志偉、趙學而、車婉婉等，前晚在將軍澳電視城為《超級無敵獎門人 終極篇》錄影，首次以情侶檔亮相的金剛和蕊蕊，在拍攝前都大方搭膊頭合照，金剛承認親自邀請女友上節目，蕊蕊即謂：「多謝你！」金剛聞言說：「唔使咁客氣，自己人講依啲嘢！」蕊蕊聽罷滿面通紅，擺明冧爆！
拍攝時，一眾「獎老」叫金剛向獎門人志偉介紹蕊蕊，志偉就寸爆金剛花心：「唔使啦！佢個個星期都轉，下個星期又唔同o架啦！」之後志偉更罰蕊蕊陪金剛食辣壽司，擺明錫住女友的金剛只讓她食壽司的配料：「你食蛋先！」志偉就大講有味笑話：「咩話？你叫佢食你隻蛋先？」食到語無倫次的金剛更對蕊蕊謂：「真係好辣呀！好似你喺我心目中咁辣呀！」又突然大唱經典金曲《追》，被蕊蕊一手將辣壽司擺在他口中說：「食嘢啦你！」場面搞笑！在模仿藝人環節，金剛自爆小時候曾被指五官似郭富城，志偉繼續寸嘴：「咁我代城城頂你個肺！」
志偉斟張衞健拍劇
志偉受訪時，坦言已答應為林錦堂扶靈，問到會否與今年60大壽的他相沖，一向有義氣的他指：「朋友緊要，唔好咁迷信啦！」有報道指他將開經理人公司，還會以8位數價錢簽張衞健，他表示的確有意開公司，但只希望張衞健能回無綫拍劇。
另外，謝霆鋒的舊愛趙學而和緋聞女友車婉婉，均表示有留意王菲與李亞鵬離婚的新聞，但不想評論有關霆鋒與王菲之間的傳聞，已婚的學而更謂：「顧住自己先！」
文：影視組