志偉斥追究過時 陳鍵鋒拍爛手掌

通訊事務管理局昨日宣布無綫電視涉違反反競爭條款,結果將影響大批電視藝員及各大唱片公司歌手,可謂牽連甚廣!在娛圈甚有影響力的曾志偉以及一班忠心藝員黎耀祥、蔡少芬和鍾嘉欣等力撐無綫,相反已跟無綫割席的陳鍵鋒大感心涼,又重提當年的冤屈史。

本地電視業多年來由無綫一台獨大,惟昨日通訊事務管理局宣布無綫涉違反反競爭條款,指出無綫藝員有節目在其他台播放,合約會禁止他們宣傳,亦不得使用廣東話接受其他電視台訪問,非全職工作的藝員及歌手要為無綫作獨家演出,此等均違反反競爭條款。

消息公布後,大批演藝人士發表意見,多年來為無綫効力的藝員自然力撐娘家,三屆視帝黎耀祥現時是無綫合約藝人,他認同簽合約後沒有理由幫其他公司工作:「唔可以用廣東話接受其他台訪問都合理,始終係娛樂節目,唔應該協助其他台,唔覺得咁叫壟斷,電台DJ都唔會幾邊走啦!(內地劇喺香港其他台播要配音。)咁係迎合內地市場,返嚟香港播應該配過,咁想聽我就睇無綫囉!」對於台灣藝員自由度甚大,祥仔認為兩地文化不同,香港電視業以此方式運作已是一種歷史文化。

蔡少芬贊同稍作調節

與無綫關係友好的曾志偉認為事件始於09年,現在才追究有點過時:「聽講TVB將有行動,以藝人立場觀察,呢幾年好多嘢都變咗,訪問唔可以廣東話、掛咪、歌手唔可以上其他台,都改變咗。」他又數出李香琴及周聰等老牌藝員簽一騷合約,自由度甚高,恍如半個老闆般發言,他說:「作為老闆唔想藝員去其他台係無可厚非,其實係因為冇競爭對手,一夫一妻制咁,你得一個老婆,佢梗係成日叫你返屋企,如果係一夫多妻,老婆點敢成日叫你返?」

港姐出身兼曾奪視后的蔡少芬與無綫仍有部頭合約,她認為簽合約就要尊重合約精神:「咁多年都習慣呢種模式,既然有無綫合約,唔參與其他台演出係好正常,暫時未可以同台灣直接比較,香港係細地方,而且利益上仲有衝突。」但她認為若稍作調節是好事,可方便觀眾在無綫以外聽到藝員說廣東話。而演藝人協會秘書長陳芷菁表示:「這是一個自由的社會,很多事情都是你情我願。我曾經離開過,還是覺得TVB整體配套最好。」

藝人價值由市場主導

相反與無綫已鬧翻的陳鍵鋒直言得悉事件後「幾開心」,認為「終於有人踏出第一步正視問題」,當年他傾續約時因數十元爭持不下,並不滿出席活動要避其他台鏡頭,現時鍵鋒在內地發展理想,直言享受現在自由身拍劇。提到當年冤屈,他似乎仍一肚氣:「合約唔公平,唔開心會影響演出,當時我情緒真係有問題!知道好多藝員工時同人工唔成正比,有人去唔到最低工資,但為出鏡無奈都要簽。(覺得為自己平反?)我冇嬲,奉勸新人簽約要睇清楚。」他希望世界大同,藝員可在不同平台亮相,認為電視台胸襟應該大啲:「依家香港娛樂圈生態好奇怪,藝人價值應該由市場主導,無綫壟斷捧邊個,係咪代表呢個人有最高收視保證?歌手就唔走音?至於唔可以用廣東話,睇都覺得奇怪啦!明明香港人唔講廣東話。」

文:影視組

第一手消息請下載on.cc東方互動iPhone/iPad/Android Apps