方大同處男紅館騷 點少得薛凱琪
方大同出道8年，今年決定踩上紅館舞台，昨日舉行「方大同Soulboy Lights Up世界巡迴演唱會－香港站」記者會，公布11月30日及12月1日在紅館開處男騷，而香港是巡迴首站，唱片公司金牌大風預祝大同未來在四大洲舉行20場巡迴個唱，主辦商送上一支復古金咪及太陽眼鏡給大同賀他開騷。
至於大同忙於籌備個唱令他心情緊張，在台上多謝主辦機構時有點甩漏，事後大同坦言近日太多事要忙，要製作新專輯，又要準備個唱及為其他歌手寫歌，所以才一時分心。提到大同曾言紅館不適合他演唱，大同解釋：「嗰時係覺得未啱時候，要配合天時地利人和去做，之前去咗台灣拍咗片放喺個唱用，自己有啲新想法同要求，希望可以畀觀眾睇到。」
阿媽代傾歌酬
今次是否碌爆人情卡，請緋聞女友薛凱琪做嘉賓？大同坦言：「佢知我開個唱，我都會邀請佢嚟，但知佢嗰段時間要拍戲，要視乎佢嘅檔期。」講到升呢上紅館，歌酬是否跟着升呢？大同表示：「我又唔係完全了解歌酬嘅事。（由阿媽去傾？）係，阿媽處理。」
文：音樂組