許亦妮買套遇險 陳柏宇血濺護花

擁有35D「Big」爆上圍的前港姐許亦妮、陳柏宇、關楚耀、何佩瑜（Jeana）等，前晚為新戲《喜愛夜蒲3》到中環擺花街拍外景。當晚劇情講述穿上低胸露腰背心的許亦妮，谷行4吋事業線，在便利店購買安全套及水，而離開時突然有兩名大漢衝上前，一左一右企圖把她捉住，陳柏宇見狀即上前護花擋架，結果慘被爆樽！

除衫騷六舊腹肌

眾演員於拍攝前都有試位，當拍至最後一個鏡頭時不慎「假戲真做」，令陳柏宇被道具樽弄傷，頭部流血，他即時用毛巾掩着傷口。導演錢國偉及工作人員馬上查看傷勢，並消毒傷口，而為免弄濕戲服，陳柏宇索性脫掉上衣，露出背脊大片紋身及六舊腹肌。身旁的許亦妮見狀顯得一臉憂心，至於飾演便利店職員的關楚耀，在陳柏宇整理傷口期間，走出門口偷笑湊熱鬧。

英雄救美總要付出代價，陳柏宇為救許亦妮慘被爆樽。

陳柏宇被道具樽擊中受傷，毛巾亦有少許血漬。

另外，同場等埋位的Jeana則獨自坐埋一邊玩電話，即使監製伍健雄在旁，二人亦沒有交流，而專程前來探班的伍詠薇就與工作人員聊天，期間有粉絲要求合照，她亦有求必應。

陳柏宇在消毒傷口時，關楚耀在後面偷笑。

坐在監製伍健雄旁邊的Jeana自顧篤電話。

女友「扑濕」報仇

本報昨日就陳柏宇「爆缸」一事致電錢國偉，他感抱歉地表示：「我都唔好意思，拍爆樽戲變咗真係爆樽，好在傷口唔深，只係皮外傷，（傷口幾大？）一塊指甲咁細，唔使去醫院。」事後他又指陳柏宇受傷仍堅持繼續拍，大讚他夠專業。而陳柏宇接受電話訪問時表示：「流咗少少血，唔會有疤，貼塊藥水膠布就冇事。之前我拍MV都試過拍扑頭戲，不過當時冇發生咩事。（女友有否擔心傷勢？）佢話要『扑濕』番『扑濕』我嗰個！」而關楚耀稱沒有偷笑陳柏宇，事後還有問候他傷勢。

文、攝：追蹤組