兩僑三點獻咀 打沉密實許亦妮
女星雨僑、o靚模何佩瑜（Jeana）及港姐許亦妮昨日出海為新片拍攝開船P戲，早前已傳出三女爭風頭爭到出晒面，昨日眾女齊以泳衣上陣，big波蕩漾，「胸器」盡出！與韓國型男有咀戲的雨僑風騷谷胸，但Jeana上圍卻離奇縮水，幸身材勻稱，而被指囂張的許亦妮穿一件頭泳衣，即時降呢輸晒！
昨日電影《喜愛夜蒲3》拉隊出海拍攝遊船河戲份，導演錢國偉率領幾十位比堅尼女與一眾男、女主角歌手林德信、陳柏宇、應昌佑、雨僑、Jeana及許亦妮等大晒冷。
Jeana縮水輸蝕
早前已有指三位女主角爭戲份，許亦妮更被指態度囂張遭杯葛，昨日天氣炎熱，眾女齊齊首次穿上性感比堅尼上船開工，雖然熱得大汗淋漓，各女仍盡展渾身解數搶鏡，偏偏許亦妮被安排着一件頭泳衣，大殺風景！而向來身材豐滿的Jeana，昨日亦身材大縮水，同樣執輸。
由於影片清晨時分展開拍攝，午間眾女開始妝溶及略有疲態，三位女主角都沒甚交談，不過雨僑依然表現興奮，還自爆說：「一嚟到見到件泳衣都好驚，因為怕會走光，自己第一次着比堅尼工作，都幾緊張，因為同場其他人都好性感。（怕唔怕被比下去？）天外有天，人外有人，冇得咁比；今日我仲會獻出埋自己銀幕初吻，因為場口講我同未婚夫林德信一齊去船P，但我就同另一個韓國男仔偷食，而佢就同Jeana偷食。」
一件頭都靚
擁有35D身段的許亦妮對穿毫無睇頭的一件頭泳衣，死撐說：「畀多啲唔同嘅嘢人哋睇嘛。（會唔會想着比堅尼多啲？）我唔介意，都係睇佢哋安排。（你好輸蝕喎？）唔會，我都好靚呀！」堅稱仍然「惹火」的她在戲中跟陳柏宇合演一對，二人還會有親熱戲，自言沒拍過親熱戲的許亦妮表示不緊張，她說：「都冇乜特別要準備，做得演員就要好快入到戲！」果然夠open。
文：名人組