張智霖變Wet魔床戰索女

張智霖(Chilam)為延續《衝上雲霄II》熱潮,除了重唱第一集的主題曲《歲月如歌》外,更重金拍攝MV及chok爆相集,其中一幕與索女上演「床上戲」,並由「Cool魔」變「Wet魔」,在浴室大玩濕身誘惑。

近期憑無綫劇集《衝上雲霄II》而人氣急升的張智霖與唱片公司續約後,積極籌備新碟爭做樂壇一哥,更獲公司重錘出擊買下《衝I》主題曲 《歲月如歌》的版權,由「Cool魔」Chilam重新翻唱,結果旋即在網上瘋傳。有見及此,公司決定除了為新歌拍攝MV外,更同時推出一輯名為 《Cool魔日記》的寫真相集,滿足一班對「靚仔機師」嗒晒糖的粉絲。

浴室濕身施誘

Chilam今次親自為MV及相集操刀,在構思、編排、服裝、故事內容等方面都出心出力,他笑言:「冇人比我更熟悉Cool魔,我嘅日記當然要由自己參與編寫。」

而MV更邀請新人李梓言(Jessie)擔任女主角,與Chilam演「床上戲」,在床上為他扣衫鈕調情。不過最令人期待的是,Chilam在浴室中被人狂射水,大玩濕身誘惑,惟美中不足的是他未有露點演出,認真錫身。

情侶爭風呷醋

而在中環電車路取景時,有一對情侶因「Cool魔」魅力沒法擋而鬧交收場,事緣一位女粉絲因駐足睇Chilam拍攝,怎料男友打爛醋埕,兩人更在街上大聲鬧交而阻礙拍攝。另外,新老闆蕭定一昨日在電台訪問中承認以八位數搶簽Chilam過檔:「就算依家貴一倍都制。(喺王家衛手上搶人?)佢都有梁朝偉,依家似情侶檔,好過一腳搭兩船。」他又直認與無綫正構思合作開拍《衝》電影版。

文:音樂組