陳柏宇半天吊痛啜許亦妮
男歌手陳柏宇（Jason）前晚與35D巨胸港姐許亦妮在中環吊威吔拍空中咀嘴戲，許亦妮更胸壓Jason，看似艷福無邊，但全程下身被箍實的Jason不時流露痛苦表情，他直言「戚袋袋」經歷男人最痛，辛苦晒「小J神」。
陳柏宇、許亦妮（Whitney）、雨僑、伍詠薇及郭穎兒等前晚在中環雲咸街拍攝電影《喜愛夜蒲3》，劇組出動吊臂拍攝Jason及Whitney的空中浪漫咀戲，兩人被吊至兩層樓高，身材豐滿的Whitney更壓實Jason，看似艷福無邊，但因下體被「箍得太緊」，Jason不時露出慘樣，每逢落地即擘開腳讓「小J神」抖抖。
會向女友備案
曾一「舉」成名的Jason直指「戚袋袋」經歷男人之痛，他笑說：「一直冇覺得自己特別大，依家想細啲，甚至做女仔。（着多條底褲？）冇呀！仲係鬆身嗰啲，大鑊喇！希望吊完成晚之後唔好影響生育能力！（女友知道？）未知呀！但我會話佢聽，等佢知搵錢咁辛苦。」問到與Whitney親熱感覺如何？他冷淡地表示都係咁啦，隨即解釋怕誇讚對方會被女友打。首次吊威吔及kiss的Whitney表示幸得好友沈震軒探班壯膽，問到有否keep fit應付之後的床戲？她說：「可能太忙瘦咗。（胸部縮水？）希望大家都留意我演技！」
伍詠薇傳訊息
至於伍詠薇身穿bra top加冇袖外套，力撼一眾後生女，已十一年沒有拍戲的她表示很信任監製伍健雄，多年前曾為對方的電影《9413》裸露，問到今次可有激情戲？她說：「冇呀！我飾演有好多經歷嘅酒吧老闆，帶出正面訊息。（為《夜蒲4》啲情慾戲熱身？）唔係熱身，係畀監製驗身呀！」另一女主角雨僑表示將與林德信拍親熱戲，但現時不算熟落，問到如何「溶化」對方？她搞笑表示會戴上其緋聞女友松岡李那的面具。
文：影視組