人生交叉點 Kelly揀啱老公
自己的路應該自己決定，每個人都會遇上交叉點，而作出自己認為最正確的決定。已為人妻的陳慧琳，認為最正確的決定是選擇了正確的伴侶，而林峯則認為自己最正確的決定就是從小開始學唱歌，至今終身受用，大家才可以欣賞到他的好歌聲。
名模貝安琪
「自從決定學瑜伽，對自己嚟講身體好咗，亦開心咗，我有推薦朋友去學，雖然自己就無時間親自教朋友，但朋友學咗，都覺得有益身心。」
混血名模Amanda S.
「我最啱嘅決定係永遠愛我嘅家人，好多謝佢哋畀咁好嘅教育我，對我咁好，教我好多嘢，我會用餘生嚟報答佢哋。」
名模馬詩慧
「我係生咗三個小朋友，雖然都有唔開心嘅時刻，但佢哋帶畀我好多快樂，為咗小朋友，可以放棄工作，專心照顧佢哋。」
名模陳嘉容
「最啱係入咗呢行，細個嘅夢想係做警察，因為媽咪覺得做政府工係鐵飯碗，但做模特兒令我見識到好多嘢，又可以去唔同地方，認識唔同國家嘅朋友，真係冇入錯行。」
藝人林峯
「人生做得正確決定，我覺得係我細個去學唱歌，依家能夠將自己好熱愛嘅事變成為事業，真係好開心。其實我由十幾歲就開始學唱，不過可惜入咗行之後太忙，冇辦法繼續學，真係好可惜。」
歌手陳慧琳
「喺事業上，最啱嘅決定係搵咗鍾珍做我經理人。而喺家庭上，最啱嘅決定就係識到我老公，同埋結婚生仔。」