林夏薇教徐子珊喊出層次
徐子珊與林夏薇於娛樂圈年資雖然相差一大截，但面對科班出身的薇薇，子珊也忍不住「請教」兩招，自言演戲尚在摸索階段，羨慕對方能學以致用，薇薇則笑指第一眼已「愛」上子珊，認為很有家人的感覺，還有一顆謙虛的心，即使演藝路上已到達某一個位置，但仍不斷尋求進步空間，於圈中實屬難得！
林：林夏薇
徐：徐子珊
林：一開始我就好鍾意你！因為你好有一種屋企人嘅感覺。
徐：咁得意？
林：係呀！我覺得同你係會好啱，唔使成日見，我係鍾意你o架！你愛唔愛我先？哈哈。
徐：我唔識用「愛」用喺女仔度，但我都好欣賞你。
林：我仲有留意你着衫，都幾有fashion sense，簡單唔造作。
徐：唔係嘛！我都係假手於人，咁本身自己都鍾意fashion，每個月嘅必讀物，下次你誠邀我一齊shopping啦，雖然我比你男仔啲，身形都唔同，但你咁瘦着咩都好睇！我覺得你太白，可以黑少少，依家興健康嘅膚色，太過白唔太好。
林：係呀，呢排拍古裝一定黑。
當初冇諗入娛樂圈
徐：我覺得你個人傻傻地，同我有相似嘅地方。記得第一次見你，你就係因為話我好有屋企人感覺，就走埋嚟同我係咁講，之後有時喺公司見到，你都捉住同我講嘢，就連心底話都會講，但唔知你係咪對住每個人都咁講。
林：梗係唔會，我覺得你好有型，唔係單睇外表，係由入面散發出嚟，好爽又有女人味，總之就會令人鍾意，好似暗戀咁，有一種磁場吸引我想同你玩。第一次對你認識係電影《跟蹤》，短頭髮幾爽，依家長髮又適合，早排做毒后又做得好好。
徐：你係科班出身，呢樣嘢係我到依家都未得到嘅，喺演藝生涯上面有啲缺失，畢竟係需要有啲嘢back up你，幾有用冇人知，所以讀書都係有用，只係唔知幾時用得到，你仲係內地著名學校出嚟，好羨慕。
林：話時話，當時都冇諗過做呢行。
徐：冇諗做呢行就讀演藝？
林：係咁啱啫，原本考做律師，後來參加咗全國明日之星，點知又有獎，後來啲人叫我去學吓表演，但中間要考專業課程同文化課程，後來慢慢先對演戲有興趣。
徐：我都係後來先鍾意演戲喎！
林：我有留意你o架！2011年我啱啱入tvb，第一次出公司活動，當時全部人都唔識，但就留意到你同郭晉安討論緊做戲，覺得你好認真同虛心，雖然已經好多人讚你演戲好，但你都不斷問佢應該點做，呢個就係你吸引人嘅地方。
徐：好多謝你睇到我好嘅地方，對於演戲，我唔係好爐火純青，唔係有自己一套方法，好多嘢仲係試水溫，即使咁多年之後，好多角色都有重複地方，有好多嘢未試，仲係摸索階段。
林：我覺得實踐好緊要，喺學院嘅理論上面係會知道。
科班畢業先拔頭籌
徐：好想問呢，聽聞內地演員好多科班出身，學校係有一套theory教你，令你唔理感情真定假，佢哋都可以喊得好勁，take廿個take都係咁，係咪真係有㗎？
林：呢個問題都好多人問過我，以前我做話劇，好多場戲都要喊，我都唔係一開始就可以，但學校學到要分析劇本。
徐：依家我雖然有自己方法for某啲位喊多定少，感動程度去到邊，但其實係咪有個計算去做呢件事？演員都好講狀態。
林：所以習慣分析劇本，入咗角色度，好多人拍喊戲會諗自己傷心事，我係唔會喊，性格唔鍾意喊，我喊唔到，反而去諗角色入面係點，呢個方法係需要多啲時間，拍劇可以1、2個月喺角色入面生活，但有時情況會唔同，根本冇時間。我畢業出嚟嗰時都好困惑，究竟學咗啲乜？學校成日要寫角色前台詞，暑期功課仲要一句一句寫，當時覺得有需要咩，依家發現真係有用。
徐：你day one已經知道，我就要做咗幾年，先知有呢樣嘢！
林：都話你犀利，冇學過都識呢樣嘢，好似周迅咁，其實都冇學過o架，但佢有天分，有實踐過，演員好講性格，單睇佢雖然唔高，但行出嚟好有氣勢就知啦。
後記:人肉地圖王
徐子珊揸車技術有幾辣，相信狗仔隊一清二楚，其實佢認路都很犀利，從哪條大路轉入小路，連街道名也能清晰唸出。訪問當日，林夏薇從電視城駕車趕來，期間因天雨遇上大塞車，令本身認路麻麻的她更加慌張，一度走錯路，頻頻致電子珊問路，子珊即人肉地圖王上身，隔空指導她應向哪一個方向走，才能讓夏薇「衝出重圍」成功抵達。
文：影視組
攝：秦健輝
場地：Taku