莊思敏做女強人 誓甩八婆味

請教葉念琛

多數演員都有個導演夢，莊思敏亦不例外。闖入幕後做導演，更被邀請拍攝宣傳短片，成為她邁向「莊導」的第一步。初嘗手執導演筒的滋味，幕前幕後同樣撐得起。

我唔會話自己演而優則導，但係自己都想嘗試做導演嘅感覺，編劇都想做，相信要我寫個故事大綱一定冇問題。不過我擔心嘅係要將故事化成對白，我都需要啲時間練習。我有問過葉念琛意見，佢話：「咪做囉！你估咁容易做咩！」自己都有同朋友傾過，好幸運地都有人搵我拍一條禁毒宣傳片，雖然得幾十秒，拍攝時間都係得一日，不過都要準備好事前工夫，因為要用三十秒去講一個古仔，都有一定難度。拍之前都好緊張，已經周圍問啲導演同幕後貼士。雖然宣傳片用學生做演員，不過三十秒需要嘅演技唔使太多，只要做到就可以收貨。機會唔好放棄，就算只係得五十五十機會，都係睇自己肯唔肯去搏，同埋自己都希望可以藉住呢個宣傳片，被人知道莊思敏都可以做到幕後工作。

莊思敏一向敢言，可能因此經常被邀演八婆角色。	莊思敏坦言有向緋聞男友葉念琛請教執導心得。	蔣家旻與馬志威擔正演出，但莊思敏未有眼紅後輩。

冇眼紅新人

平時牙尖嘴利、見人就插的莊思敏，私下原來是「友誼小姐」。她有份拍攝的新片《第一次不是你》，男女主角起用新人擔正，前輩都要靠邊站，不過她仍錫住兩位新人，做個貼心的大師姐。

雖然出身富貴，但莊思敏絕無富二代架子。	莊思敏坦言做導演比演員有更大壓力。	莊思敏曾與呂慧儀穿比堅尼拍戲，只要不露點，她不介意性感演出。

因為套戲女主角係蔣家旻，男主角係新人馬志威，自己嘅角色又係啲好賤格嘅形象，見到現場兩個都係新人，所以拍呢套戲時，我唯一嘅心理壓力就係喺戲入面成日要喝佢哋，要對佢哋好衰！之前就要畀定心理準備佢哋。有一、兩場戲我都要鬧佢哋，要預先講定我會好大聲，同埋溝通好我可能會突然之間拍枱，因為都驚佢哋會突然之間嚇親。好彩蔣家旻之前拍過電視劇，有經驗，自己都唔使做大姐姐嘅角色，佢哋可以自己搞得掂。反而現場其他工作人員成日笑我，因為我同平時差別實在太大。

享受爛撻撻

被「八婆仔」角色定型，莊思敏要搣甩形象絕非容易。今次她在新片中要「大住肚」演女版扯皮條，又以素顏上陣，踢走靚女形象，可謂演技大考驗。

喺電影世界入面，我自己係冇咩限制，只要唔露點嘅情況下，我都可以接受角色。拍咗戲咁耐，做「八婆仔」嘅角色真係做得太多，今次難得唔使性感，而且角色比較特別，我係做女版扯皮條，所以係好爛撻撻。導演又唔畀我化妝，仲特登為部戲染咗個『核突金』嘅頭，啲衫係完全唔靚。第一次做大肚婆，第一次素顏，今次肯有咁大嘗試，係因為我相信導演葉念琛。大家都合作過太多次，所以我都好信任佢嘅安排，反而最大難度係要去模仿大肚婆。自己講嘢好快，行路急，拍戲嗰時啲人成日都笑我要落仔，所以要再去調整自己，行路都要慢慢嚟。

後記：零富二代架子

雖然莊思敏展開「莊導」的追夢旅程，但身為馬國拿督女兒的她仍非常講義氣，就算因上一單工作延期，但仍堅守約定，永不遲到。拍攝現場被冷氣狂吹，她依然繼續露腰上陣，完全沒有富二代架子。

口述：莊思敏

筆錄：專案組

攝：李柏儒

場地：Craftsteak