發哥有地位借景冇阻滯
【陸曼美澳門直擊】周潤發為新片到澳門取景，以一身潮爆造型上陣的他，單是一個憂鬱眼神已夠晒煞食，就連導演王晶也直言發哥厲害，只要提到他的名字，於香港任何地方借地方拍攝，均能獲有關部門開綠燈批准，故與對方合作絕對有着數。
周潤發、杜汶澤、謝霆鋒等連日來齊集澳門威尼斯人酒店，為王晶新片《賭城風雲》拍外景，原定一場在泳池的大場面戲份，惟天公不造美，令拍攝期一改再改，最後也未能完成，正受家事煩惱的霆鋒，於日前完成通宵戲後已回港。
霆鋒趕住回港
前晚大隊則單獨拍攝發哥文戲部分，梳起一頭潮髮配吊腳褲的他，拋下一個心事重重的憂鬱眼神，貴為影壇巨星，當然NG都不用便輕易過關。期間，不用拍攝的阿澤則穿上背心及孖煙囪現身，同行亦有曾與薛凱琪傳緋聞的黑人高層，阿澤笑謂：「頭先去咗游水，本來都有叫霆鋒留低，佢要走咋嘛，（佢有家事煩緊？）唔好問我，我唔知。」
王晶則透露若然未能完成泳池戲份，有機會大隊稍後再折返補拍，或改於香港泳池拍攝，更指今次獲酒店方面全面贊助食宿，問到是否藉今次機會宣布回歸本地影壇？王晶笑謂：「唔係，因為發哥身價係天價，只有內地先可以cover到，大家又合作無間，一年前先合作完《大上海》，有晒默契，用佢有着數添！香港要借任何景，只要用佢個名就批，慳番好大筆，畀貴片酬都值得，發哥仲有歐美市場！（霆鋒最近家事好煩，有冇請假？）冇，佢好叻仔同專業，識得處理家事，唔使擔心佢。」
