李治廷 范冰冰驚爆姊弟戀
黎明愛將李治廷（Aarif）出道至今先後與Janice Man（文詠珊）及謝婷婷傳緋聞，每次都急急澄清否認，近日被傳與內地女星范冰冰撻着的Aarif，前晚一反常態主動提起對方，更以「唔知係咪拍拖」默認戀情，隨即讚到「女神」天上有地下無，被窮追猛打下的Aarif答到「亂晒龍」，對於「姊弟戀」，Aarif說：「愛情嚟到會珍惜。」
26歲的Aarif一直視31歲的范冰冰為「女神」，去年終有機會與對方結片緣，能夠與女神合作的Aarif把握機會親近對方，據知，Aarif在片場不時主動撩冰冰傾偈，雖然現場不少工作人員，但兩人不避嫌細聲講大聲笑，甚至眾目睽睽下眉來眼去，這對姊弟戀早已被劇組人員識破，直至近月終被踢爆，Aarif連月來與冰冰宣傳時不停大讚對方。日前女方自爆母親對Aarif有好感，雖然兩人宣傳期已告一段落，據可靠消息稱，兩人一直保持聯絡。
多方面有默契
Aarif向來對不實緋聞採取親身否認，前晚他出席活動時被問到是否與李冰冰傳緋聞？Aarif澄清說：「我同李冰冰冇拍拖。」隨即主動提起范冰冰並滔滔不絕說：「我係同范冰冰拍電影，我哋係好close嘅朋友。（你哋私下好開心？）係，點解唔開心？」Aarif坦言對兩人現時的關係感開心，他說：「佢教我好多嘢，幾犀利嘅演員，喺佢身上學到好多嘢，我哋有好多方面嘅默契，傾偈好啱key。」當問到兩人是否拍拖？Aarif呆一呆說：「唔知、唔講。」與過往回應緋聞態度截然不同。
再問是否拍拖？Aarif錯亂地說：「又唔係，唔需要樣樣嘢都去講，自己搵到開心狀態，值得珍惜嘅嘢。」他承認冰冰較他年長，問到是否接受姊弟戀？Aarif說：「接受，戀愛係冇規範同規矩，尊重緣分同愛情，愛情嚟到會珍惜。（冰冰係你珍惜嘅人？）係。」當問兩人何時開始？他說：「你哋係咪諗多咗？（講友誼喎？）上年合作認識。」問到有否發展機會？他說：「好難講，明明朋友講到咁好尷尬。」
赴北京約食飯
Aarif承認每次到北京都會找冰冰食飯、吹水，他說：「傾吓電影同音樂。（你好欣賞佢？）係呀，同佢未合作已經覺得佢形象好靚、高高在上，合作後係多層次欣賞佢，佢好勤力、好專業同好踏實。」由於Aarif答到模稜兩可，問到兩人目前是否朋友關係？Aarif無奈嘆氣說：「唉！係呀。」
採訪：音樂組